Centurie III
< sommaire >

de la première édition de Macé Bonhomme
parue à Lyon en 1555 (bibliothèque d'Albi)
du quatrain 0201 au 0300

mise en page provisoire

0201
Apres combat & bataille nauale,
Le grand Neptune à son plus hault beffroy,
Rouge auersaire de fraieur viendra pasle,
Metant le grand ocean en effroy.

0202
Le diuin verbe donrra à la sustance
Comprins ciel terre,or occult au fait mystique
Corps,ame,esprit aiant toute puissance,
Tant sous ses pieds,comme au siege celique.

0203
Mars & Mercure & l’argent ioint ensemble
Vers le midi extreme siccité:
Au fond d’Asie on dira terre tremble,
Corinthe,Ephese lors en perplexité.

0204
Quand seront proches le defaut des lunaires,
De l’vn a l’autre ne distant grandement,
Ftoid,siccité,danger vers les frontieres, (froid)
Mesmes ou l’oracle a prins commencement.

0205
Pres,loing defaut de deux grand luminaires
Qui suruiendra entre l’Auril & Mars.
O quel cherté! mais deux grands debonaires
Par terre & mer secourront toutes pars.

0206
Dans temples clos le foudre y entrera,
Les citadins dedans leurs forts greués:
Cheuaux,beufs,hommes,l’onde mur touchera,
Par faim,soif sous les plus foibles arnés.

0207
Les fuitifs,feu du ciel sus les piques:
Conflit prochain des corbeaux s’esbatans,
De terre on crie aide secour celiques,
Quand pres des murs seront les combatans

0208
Les Cimbres ioints auecques leurs voisins,
Depopuler viendront presque l’Hespaigne:
Gents amassés Guienne & Limosins
Seront en ligue,& leur feront compaignie.

0209
Bourdeaux,Rouen & la Rochele ioints
Tiendront au tour la grand mer oceane:
Anglois,Bretons & les Flamans conioints
Les chasseront iusques au-pres de Roane

0210
De sang & faim plus grande calamité
Sept fois s’apreste à la marine plage,
Monech de faim,lieu prins,captiuité,
Le grand mené croc en ferrée caige.

0211
Les armes batre au ciel longue saison,
L’arbre au milieu de la cité tumbé:
Vermine,rongne,glaiue en face tyson,
Lors le monarque d’Hadrie succombé.

0212
Par la tumeur de Heb.Po,Tag. Timbre & Rosne
Et par l’estang Leman & Aretin,
Les deux grans chefs & cites de Garonne
Prins,morts,noies.Partir humain butin.

0213
Par foudre en l’arche or & argent fondu:
Des deux captifs l’vn l’autre mangera:
De la cité le plus grand estendu,
Quand submergée la classe nagera.

0214
Par le rameau du vaillant personage
De France infime:par le pere infelice
Honneurs,richesses trauail en son viel aage
Pour auoir creu le conseil d’homme nice.

0215
Cueur, vigueur,gloire le regne changera
De tous points contre aiant son aduersaire.
Lors France enfance par mort subiuguera.
Le grand regent sera lors plus contraire.

0216
Le prince Anglois Mars à son cueur de ciel
Voudra poursuiure sa fortune prospere,
Des deux duelles l’vn percera le fiel:
Hay de lui,bien aymé de sa mere.

0217
Mont Auentine brusler nuit sera veu:
Le ciel obscur tout à vn coup en Flandres,
Quand le monarque chassera son nepueu:
Leurs gens d’Eglise commetront les esclandres.

0218
Apres la pluie laict assés longuete,
En plusieurs lieux de Reins le ciel touché
Helasquel meurtre de seng pres d’eux s’apreste.
Peres & filz rois n’oseront aprocher.

0219
En Luques sang & laict viendra plouuoir:
Vn peu deuant changement de preteur,
Grand peste & guerre,faim & soif fera voyr
Loing,ou mourra leur prince recteur.

0220
Par les contrées du grand fleuue Bethique
Loing d’Ibere,au regne de Granade,
Croix repoussées par gens Mahumetiques
Vn de Cordube trahira la contrade.

0221
Au crustamin par mer Hadriatique
Apparoistra vn horride poisson,
De face humaine,& la fin aquatique,
Qui se prendra dehors de l’ameçon.

0222
Six iours l’assaut deuant cité donné:
Liurée sera forte & aspre bataille:
Trois la rendront & à eux pardonné:
Le reste a feu & sang tranche traille.

0223
Si France passes outre mer lygustique,
Tu te verras en isles & mers enclos:
Mahommet contraire:plus mer Hadriatique:
Cheuaux & d’asnes tu rougeras les os.

0224
De l’entreprinse grande confusion,
Perte de gens,thresor innumerable:
Tu ny dois faire encor extension
France a mon dire fais que sois recordable.

0225
Qui au royaume Nauarrois paruiendra
Quand de Secile & naples seront ioints:
Bigorre & Landes par Foyx Loron tiendra,
D’vn qui d’Hespaigne sera par trop conioint

0226
Des rois & princes dresseront simulacres,
Augures,creuz esleués aruspices:
Corne,victime d’orée,& d’azur,d’acre:
Interpretés seront les extispices.

0227
Prince Libyque puissant en Occident
Francois d’Arabe viendra tant enflammer:
Scauans aux letres fera condescendent,
La langue Arabe en Francois translater.

0228
De terre foible & pauure parentele,
Par bout & paix paruiendra dans l’empire.
Long temps regner vne ieune femele,
Qu’oncq en regne n’en suruint vn si pire.

0229
Les deux nepueus en diuers lieux nourris:
Nauale pugne,terre,peres tumbés
Viendront si haut esleués enguerris
Venger l’iniure:ennemis succombés.

0230
Celuy qu’en luite & fer au fait bellique,
Aura porté plus grand que lui le pris,
De nuit au lit six lui feront la pique,
Nud sans harnois subit sera surpris.

0231
Aux champs de Mede,d’Arabe & d’Armenie,
Deux grands copies trois foys s’assembleront:
Pres du riuage d’Araxes la mesnie,
Du grand Solman en terre tomberont.

0232
Le grand sepulcre du peuple Aquitanique
S’aprochera aupres de la Tousquane,
Quand Mars sera pres du coing Germanique,
Et au terroir de la gent Mantuane.

0233
En la cité ou le loup entrera,
Bien pres de là les ennemis seront:
Copie estrange grand païs gastera.
Aux murs & Alpes les amis passeront.

0234
Quand le defaut du soleil lors sera,
Sus le plain iour le monstre sera veu:
Tout autrement on l’interpretera.
Cherté n’a garde: nul ny aura pourueu.

0235
Du plus profond de l’Occident d’Europe,
De pauures gens vn ieune enfant naistra,
Qui par sa langue seduira grande troupe:
Son bruit au regne d’Orient plus croistra.

0236
Enseueli non mort apopletique
Sera trouue auoir les mains mangées:
Quand la cité damnera l’heretique,
Qu’auoit leurs loys si leur sembloit changées.

0237
Auant l’assaut oraison prononcée:
Milan prins d’aigle par embusches deceuz:
Muraille antique par canons enfoncée,
Par feu & sang à mercy peu receuz.

0238
La gent Gauloise & nation estrange
Outre les monts,morts prins & profligés:
Au mois contraire & proche de vendange
Par les seigneurs en accord rediges.

0239
Les sept en trois mis en concorde
Pour subiuguer des alpes Apennines:
Mais la tempeste & Ligure couarde
Les profligent en subites ruines.

0240
Le grand theatre se viendra redresser:
Le dez geté,& les rets ia tendus.
Trop le premier en glaz viendra lasser,
Par arcs prostraits de long temps ia fendus.

0241
Bosseu sera esleu par le conseil,
Plus hideux monstre en terre n’aperceu.
Le coup volant prelat creuera l’œil:
Le traistre au roy pour fidele receu.

0242
L’enfant naistra à deux dents à la gorge
Pierres en Tuscie par pluie tomberont:
Peu d’ans apres ne sera bled,ne orge,
Pour saouler ceux qui de faim failliront.

0243
Gents d’alentour de Tarn,Loth,& Garonne,
Gardés les monts Apennines passer,
Vostre tombeau pres de Rome & d'Anconne
Le noir poil crespe fera trophée dresser.

0244
Quand l’animal à l’homme domestique
Apres grands peines & saults viendra parler:
Le foudre à vierge sera si maleficque,
De terre prinse,& suspendue en l’air.

0245
Les cinq estranges entrés dedans le temple,
Leur sang viendra la terre prophaner:
Aux Thoulousains sera bien dur exemple
D’un qui viendra ses loys exterminer.

0246
Le ciel(de Plancus la cité) nous presaige
Par clairs insignes & par estoiles fixes,
Que de son change subit s’aproche l’aage,
Ne pour son bien, ne pour ses malefices.

0247
Le vieux monarche deschassé de son regne
Aux Orients son secours ira querre:
Pour peur des croix pliera son enseigne:
En Mitilene ira pour port et terre.

0248
Sept cents captifs estaches rudement
Pour la moitie meurtrir,donné le sort,
Le proche espoir viendra si promptement,
Mais non si tost qu’une quinzieme mort.

0249
Regne Gauloys tu seras bien change:
En lieu estrange est translaté l’empire
Entre autres meurs,& loys seras rangé :
Rouan & Chartres te feront bien du pire.

0250
La republicque de la grande cité
A grand rigueur ne voudra consentir:
Roy sortir hors par trompete cité
L’eschele au mur,la cité repentir.

0251
P A R I S coniure vn grand meurtre commetre,
Bloys le fera sortir en plain effet:
Ceux d’Orleans voudront leur chef remetre,
Angiers,Troye,langres leur ferontgrandforfait.

0252
En la Campaigne sera si longue pluie,
Et en la Pouile si grande siccité.
Coq verra l’aigle,l’aesle mal accomplie:
Par Lyon mise sera en extremité.

0253
Quand le plus grand emportera le pris
De Nuremberg d’Auspurg,& ceux de Basle
Par Aggripine chef Francqfort repris
Transuerseront par Flamans iusques en Gale.

0254
L’un des plus grands fuira aux Hespaignes,
Qu’en longue plaie apres viendra saigner:
Passant copies par les hautes montaignes
Deuastant tout & puis en paix regner.

0255
En l’an qu’un oeil en France regnera,
La court sera à vn bien fascheux trouble:
Le grand de Bloys son ami tuera:
Le regne mis en mal & doute double.

0256
Montauban,Nismes,Auignon, & Besier,
Peste,tonnerre & gresle à fin de Mars:
De Paris pont,Lyon mur,Montpellier,
Depuis six cent & sept XXIII.pars.

0257
Sept foys changer verrés gent Britannique
Taintz en sang en deux cent nonante an:
Franche non point par apui Germanique.
Aries doute son pole Bastarnan.

0258
Aupres du Rin des montaignes Noriques
Naistra vn grand de gents trop tard venu,
Qui defendra savrome & Pannoniques,
Qu’on ne saura qu’il sera deuenu.

0259
Barbare empire par le tiers vsurpé
La plus grand part de son sang metra à mort:
Par mort senile par luy le quart frapé,
Pour peur que sang par le sang ne soit mort.

0260
Par toute Asie grande proscription,
Mesmes en Mysie,Lysie & Pamphylie:
Sang versera par absolution
D’un ieune noir rempli de felonnie.

0261
La grande bande & secte crucigere
Se dressera en Mesopotamie:
Du proche fleuue compaignie legiere,
Que telle loy tiendra pour ennemie.

0262
Proche del duero par mer Tyrrene close
Viendra percer les grands monts Pyrenées.
La main plus courte & sa percée gloze,
A Carcassonne conduira ses menées

0263
Romain pouuoir sera du tout abas,
Son grand voysin imiter ses vestiges:
Occultes haines ciuiles,& debats
Retarderont aux bouffons leurs folligges.

0264
Le chef de Perse remplira grande olxades
Classe trireme contre gent Mahumetique
De Parthe,& Mede:& piller les Cyclades:
Repos long temps au grand port Ionique.

0265
Quand le sepulcre du grand Romain trouué,
Le iour apres sera esleu pontife,
Du senat gueres il ne sera prouué
Empoisonné son sang au sacré scyphe.

0266
Le grand baillif d’Orleans mis à mort
Sera par vn de sang vindicatif:
De mort merite ne mourra,ne par sort:
Des pieds & mains mal le faisoit captif.

0267
Vne nouuele secte de Philosophes
Mesprisant mort,or,honneurs & richesses,
Des monts Germains ne seront limitrophes:
A les ensuiure auront apui & presses.

0268
Peuple sans chef d’Espagne & d’Italie
Morts,profligés dedans le Cherronnesse:
Leur duyct trahi par legiere folie
Le sang nager par tout à la trauerse.

0269
Grand exercite conduict par iouuenceau,
Se viendra rendre aux mains des ennemis:
Mais le viellard nay au demi pourceau,
Fera Chalon & Mascon estre amis.

0270
La grand Bretagne comprinse l’Angleterre
Viendra par eaux si hault à inunder
La ligue neusue d’Ausonne fera guerre,
Que contre eux mesmes il se viendront bander

0271
Ceux dans les isles de long temps assiegés
Prendront vigueur force contre ennemis:
Ceux par dehors morts de faim profligés,
En plus grand faim que iamais seront mis.

0272
Le bon viellard tout vif enseueli,
Pres du grand fleuue par fauce souspeçon:
Le nouueau vieux de richesse ennobli
Prins au chemin tout l’or de la rançon.

0273
Quand dans le regne paruiendra le boiteux
Competiteur aura proche bastard:
Luy & le regne viendront si fort rogneux,
Qu’ains qu’il guerisse son fait sera bien tard.

0274
Naples,Florence,Fauence & Imole,
Seront en termes de telle facherie,
Que pour complaire aux malheureux de Nolle,
Plainct d’auoir fait à son chef moquerie.

0275
P A.V. Veronne,Vicence,Sarragousse
De glaifues loings terroirs de sang humides:
Peste si grande viendra à la grand gousse
Proches secours,& bien loing les remedes.

0276
En Germanie naistront diuerses sectes,
S’approchans fort de l’heureux paganisme,
Le cueur captif & petites receptes,
Feront retour à payer le vray disme.

0277
Le tiers climat soubz Aries comprins
Lan mil sept cens vingt & sept en Octobre,
Le roy de Perse par ceux d’Egypte prins:
Conflict,mort,perte:à la croix grand opprobe.

0278
Le chef d’Escosse auec six d’Alemagne
Par gens de mer Orientaux captifs,
Transuerseront le Calpre & Hespagne
Present en Perse au nouueau roy craintif.

0279
L’ordre fatal sempiternel par chaisne
Viendra tourner par ordre consequent:
Du port Phocen sera rompue la chaisne:
La cité prinse,l’ennemi quand & quand.

0280
Du regne Anglois l’indigne deschassé,
Le conseillier par ire mis à feu:
Ses adherans iront si bas tracer,
Que le bastard sera demi receu.

0281
Le grand criard sans honte audacieux,
Sera esleu gouuerneur de l’armée:
La hardiesse de son contentieux,
Le pont rompu,cité de peur pasmée:

0282
Freins, Antibol,villes au tour de Nice,
Seront vastées fer, par mer & par terre:
Les sauterelles terre & mer vent propice,
Prins,morts,troussés,pilles sans loy de guerre.

0283
Les lons cheueux de la Gaule Celtique
Accompagnés d’estranges nations,
Metront captif la gent Aquitanique,
Pour succomber à internitions.

0284
La grand cité sera bien desolée
Des habitants vn seul ny demeurra:
Mur,sexe,temple,& vierge violée
Par fer,feu,peste,canon peuple mourra.

0285
La cité prinse par tromperie & fraude,
Par le moyen d’vn beau ieune atrapé:
Lassaut donné Roubine pres de l’avde
Luy & touts morts pour auoir bien trompé.

0286
Le chef d’Ausonne aux Hespagnes ira
Par mer fera arrest dedans Marseille:
Auant sa mort vn long temps languira:
Apres sa mort lon verra grand merueille:

0287
Classe Gauloyse n’aproches de Corseigne
Moins de sardaigne,tu t’en repentiras
Trestous mourres frustrés de laide Grogne: [mourrés]
Sang nagera:captif ne me croyras.

0288
De Barcelonne par mer si grand armee,
Toute Marseille de frayeur tremblera:
Isles saisies de mer aide fermée,
Ton traditeur en terre nagera.

0289
En ce temps la sera frustré Cypres
De son secours,de ceux de mer Egée:
Vieux trucidés:mais par masles & lyphres
Seduict leur roy,royne plus outragée.

0290
Le grand Satyre & Tigre de Hyrcanie,
Don presente à ceux de l’Ocean:
Le chef de classe istra de Carmanie
Qui prendra terre au Tyrren Phocean.

0291
L’arbre qu’auoit par long temps mort seché,
Dans vne nuit viendra a reuerdir:
Cron.roy malade,prince pied estaché
Craint d’ennemis fera voile bondir.

0292
Le monde proche du dernier periode,
Saturne encor tard sera de retour:
Translat empire devers nation Brodde:
L’œil arraché à Narbon par Autour.

0293
Dans Auignon tout le chef de l’empire
Fera arrest pour Paris desolé:
Tricast tiendra l’Annibalique ire:
Lyon par change sera mal consolé.

0294
De cinq cent ans plus compte lon tiendra
Celuy qu’estoit l’ornement de son temps:
Puis à vn coup grande clarté donrra
Que par ce siecle les rendra trescontens.

0295
La loy Moricque on verra defaillir:
Apres vne autre beaucoup plus seductiue,
Boristhenes premier viendra faillir:
Pardons & langue vne plus attractiue.

0296
Chef de fovssan aura gorge couper
Par le ducteur du limier & leurier:
Le faict patré par ceux du mont tarpee
Saturne en Leo xiii.de Feurier.

0297
Nouvelle loy terre neufue occuper
Vers la Syrie,Iudee,& Palestine:
Le grand empire barbare corruer,
Auant que Phebés son siecle determine.

0298
Deus royals freres si fort guerroyeront [Deux]
Qu’entre eux sera la guerre si mortelle,
Qu’vn chacun places fortes occuperont:
De regne & vie sera leur grand querele.

0299
Aux champs herbeux d’Alein & du Varneigne,
Du mont Lebron proche de la Durance,
Camp de deux pars conflict sera sy aigre:
Mesopotamie defallira en la France.

0300
Entre Gaulois le dernier honoré,
D’homme ennemi sera victorieux:
Force & terroir en moment exploré,
D’vn coup de trait quand mourra l’enuieux.