0601
L’Arc du tresor par Achilles deceu
Aux procrées sceu la quadrangulaire:
Au faict Royal le comment sera sceu
Corps veu pendu au veu du populaire.

0602
Par Mars ouvert Arles ne donra guerre,
De nuict seront les soldats estonnez:
Noir, blanc à l’inde dissimulez en terre,
Sous la fainte ombre traistres verrez & sonnez.

0603
Apres de France la victoire nauale,
Les Barchinons, Saillimons, les Phocens,
Lierre d’or, l’enclume serré dedans la basle,
Ceux de Ptolon au fraud seront consens.

0604
Le Duc de Langres assiegé dedans Dole,
Accompagné d’Autun & Lyonnois:
Geneue, Ausbourg, ioinct ceux de Mirandole,
Passer les monts contre les Anconnois.

0605
Vin sur la table en sera respandu,
Le tiers, n’aura celle qu’il pretendoit:
Deux fois du noir de Parme descendu,
Perouse à Pize fera ce qu’il cuidoit.

0606
Naples Palerme, & toute la Sicille,
Par main Barbare sera inhabitee:
Corsique, Salerne & de Sardeigne l’Isle,
Faim, peste guerre, fin de maux intentee.

0607
Sur le combat de grands cheuaux legers,
On criera le grand croissant confond:
De nuict tuer, morts, habits de bergers,
Abismes rouges dans le fossé profond.

0608
Flora, fuis, fuis le plus proche Romain,
Au Fesulan sera conflict donné:
Sang espandu, les plus grands prins à main,
Temple ne sexe ne sera pardonné.

0609
Dame à l’absence de son grand capitaine,
Sera priee d’amour du Vice Roy:
Fainte promesse & malheureuse estreine,
Entre les mains du grand Prince Baroy.

0610
Par le grand Prince limitrophe du Mans,
Preux & vaillant chef du grand exercite:
Par mer & terre de Gallots & Normans,
Caspre passer Barcelone pillé isle.

0611
L’enfant Royal contemnera la mere,
Oeil, pieds blessez rude, inobeissant,
Nouuelle à dame estrange & bien amere,
Seront tuez des siens plus de cinq cens.

0612
Le grand puisnay fera fin de la guerre
Aux Dieux assemble les excusez:
Cahors, Moissac iront long de la serre,
Refus Lestore, les Agenois rasez.

0613
De la cité marine et tributaire,
La teste raze prendra la satrapie,
Chasser sordide qui puis sera contraire,
Par quatorze ans tiendra la tyrannie.

0614
Faux exposer viendra topographie,
Seront les cruches des monumens ouuertes:
Pulluler secte, saincte philosophie,
Pour blanches noires, & pour antiques vertes.

0615
Deuant cité de l’Insubre contree,
Sept ans sera le siege deuant mis:
Le tres-grand Roy y fera son entree,
Cité puis libre hors de ses ennemis.

0616
Entree profonde par la grand Royne faicte
Rendra le lieu puissant inaccessible:
L’armee des trois Lyons sera deffaite,
Faisant dedans cas hideux & terrible.

0617
Le Prince rare de pitié & clemence
Viendra changer par mort grand cognoissance
Par grand repos le regne trauaillié,
Lors que le grand tost sera estrillé.

0618
Les assiegez couloureront leurs paches,
Sept iours apres feront cruelle issuë,
Dans repoussez, feu, sang Sept mis à l’hache
Dame captiue qu’auoit la paix tissuë.

0619
Le fort Nicene ne sera combatu
Vaincu sera par rutilant metal
Son faict sera vn long temps debatu
Aux citadins estrange espouuantal.

0620
Ambassadeurs de la Toscane langue,
Auril & May Alpes & mer passer
Celuy de veau exposera l’harangue,
Vie Gauloise ne venant effacer.

0621
Par pestilente inimitié Volsicque,
Dissimulee chassera le tyran:
Au pont de Sorgues se fera la traffique
De mettre à mort luy & son adherant.

0622
Les citoyens de Mesopotamie
Ires encontre amis de Tarraconne,
Ieux rits, banquets, toute gent endormie
Vicaire au Rosne, prins cité, ceux d’Ausone.

0623
Le Royal sceptre sera contrainct de prendre,
Ce que ses predecesseurs auoyent engagé
Puis que l’anneau on fera mal entendre,
Lors qu’on viendra le palais saccager.

0624
L’enseuely sortira du tombeau,
Fera de chaines lier le fort du pont:
Empoisonné auec œufs de Barbeau,
Grand de Lorraine par le Marquis du Pont.

0625
Par guerre longue l’exercite épuiser,
Que pour soldats ne trouueront pecune,
Lieu d’or, d’argent, cuir on viendra cuser,
Gaulois ærain, signe, croissant de Lune.

0626
Fustes & galeres autour de sept nauires,
Sera liuree vne mortelle guerre:
Chef de Madric receura coup de vires,
Deux eschapees, & cinq menees à terre.

0627
Au cainct de Vast la grand caualerie,
Proche à Ferrage empeschee au bagage:
Prompt à Turin feront tel volerie,
Que dans le fort rauiront leur hostage.

0628
Le capitaine conduira grande proye,
Sur la montagne des ennemis plus proche,
Enuironné par feu fera telle voye
Tous eschappez, or trente mis en broche.

0629
Le grand Duc d’Albe se viendra rebeller,
A ses grands peres fera le tradiment:
Le grand de Guise le viendra debeller,
Captif mené & dressé monument.

0630
Le sac s’approche, feu grand sang espandu
Po, grands fleuues aux bouuiers l’entreprise,
De Gennes, Nice apres longs attendu,
Foussan, Turin, à Sauillan la prinse.

0631
De Languedoc, & Guienne plus de dix
Mille voudront les Alpes repasser:
Grands Allobroges marcher contre Brundis
Aquin & Bresse les viendront recasser.

0632
Du mont Royal naistra d’vne casane,
Qui caue, & compte viendra tyranniser:
Dresser copie de la marche Millane,
Fauene, Florence d’or & gens espuiser.

0633
Par fraude regne, forces expolier,
La classe obsesse, passages à l’espie.
Deux faincts amys se viendront rallier,
Esueillier hayne de long temps assoupie.

0634
En grand regret sera la gent Gauloise,
Cœur vain, leger croira temerité:
Pain, sel, ne vin, eau, venin ne ceruoise,
Plus grand captif, faim, froid, necessité.

0635
La grande pesche viendra plaindre, plorer,
D’auoir esleu, trompez seront en l’aage
Guiere auec eux ne voudra demourer,
Deceu sera par ceux de son langage.

0636
Dieu, le ciel tout le diuin verbe à l’onde,
Porté par rouges sept razes à Bizance:
Contre les oingt trois cens de Tresibonde
Deux lois mettront & horreur, puis credence.

0637
Dix enuoyez, chef de nef mettre à mort,
D’vn aduerty en classe guerre ouuerte:
Confusion chef l’vn se picquee & mord,
Leryn, stecades nefs, cap dedans la nerte.

0638
L’aisné Royal sur coursier voltigeant,
Picquer viendra, si rudement courir,
Gueulle, lipee, pieds dans l’estrein pleignant
Trainé, tiré, horriblement mourir.

0639
Le conducteur de l’armee Françoise,
Cuidant perdre le principal phalange:
Par sus paué de l’auaigne & d’ardoise,
Soy parfondra par Gennes gent estrange.

0640
Dedans tonneaux, hors oingts d’huile & gresse
Seront vingt vn deuant le port fermez
Au second guet par mort feront proüesse
Gaigner les portes, & du guet assommez.