Centurie VIII
< sommaire >

de l'édition posthume de Benoît Rigaud
parue à Lyon en 1568 (copie Anatole Le Pelletier)
du quatrain 0701 au 0800

mise en page provisoire

0701
Pav, Nay, Loron plus feu qu’à sang fera,
Laude nager, fuir grand aux surrez:
Les agassas entree refusera,
Pampon, Durance les tiendra enserez

0702
Condom & aux & autour de Mirande
Ie voy du ciel feu qui les enuironne:
Sol Mars conioint au Lyon puis Marmande
Foudre, grand gresle, mur tombe dans Garonne.

0703
Au fort chasteau de Vigilanne & Resuiers
Sera serré le puisnay de Nancy:
Dedans Turin seront ards les premiers
Lors que de dueil Lyon sera transy.

0704
Dedans Monech le Coq sera receu,
Le Cardinal de France apparoistra
Par Logation Romain sera deceu,
Foiblesse à l’Aigle, & force au Coq naistra.

0705
Apparoistra temple luisant orné,
La lampe & cierge à Borne & Bretueil:
Pour la lucerne le Canton destourné,
Quand on verra le grand Coq au cercueil.

0706
Clarté fulgure à Lyon apparante
Luysant, print Malte, subit sera esteinte:
Sardon, Mauris traictera deceuante,
Geneue à Londres à Coq trahison fainte.

0707
Verceil, Milan donra intelligence
Dedans Tycin sera faicte la paye, [playe]
Courir par Saine eau, sang, feu par Florence,
Vnique cheoir d’haut en bas faisant maye.

0708
Pres de Linterne dans de tonnes fermez,
Chiuaz fera pour l’Aigle la menee,
L’esleu [cassé] luy ses gens enfermez, [chassé]
Dedans Turin rapt epouse emmenee.

0709
Pendant que l’Aigle & le Coq à Sauone
Seront vnis, Mer, Levant & Ongrie,
L’armee à Naples, Palerme, Marque d’Ancone,
Rome, Venise par Barbe horrible crie.

0710
Puanteur grande sortira de Lausanne,
Qu’on ne sçaura l’origine du fait.
L’on mettra hors toute la gent lointaine,
Feu veu au ciel, peuple estranger desfait.

0711
Peuple infiny paroistra à Vicence
Sans force, feu brusler la basilique:
Pres de Lunage desfait grand de Valence,
Lors que Venise par morte prendra pique.

0712
Apparoistra aupres de Buffalorre
L’haut & procere entré dedans Milan,
L’abbé de Foix auec ceux de sainct Morre
Feront la forbe habillez en vilan.

0713
Le croisé frere par amour effrenee
Fera par Praytus Bellerophon mourir,
Classe à milans la femme forcenee
Beu le breuuage, tous deux apres perir.

0714
Le grand credit d’or & d’argent l’abondance
Fera aueugler par libide l’honneur,
Sera cogneu d’adultere l’offence
Qui paruiendra à son grand des-honneur.

0715
Vers Aquilon grands efforts par homasse
Presque l’Europe & l’Vniuers vexer,
Les deux eclypses mettra en telle chasse,
Et aux Pannons vie & mort renforcer.

0716
Au lieu que Hieron fait sa nef fabriquer
Si grand deluge sera & si subite,
Qu’on n’aura lieu ne terre s’attaquer,
L’onde monter Fesulan Olympique.

0717
Les biens aisez subit seront desmis,
Par les trois freres le monde mis en trouble.
Cité marine saisiront ennemis,
Faim, feu, sang, peste, & de tous maux le double.

0718
De Flore issue de sa mort sera cause,
Vn temps deuant par ieune & vieille bueyre
Car les trois lys luy feront telle pause,
Par son fruit sauue comme chair crue mueyre.

0719
A soustenir la grande cappe troublee,
Pour l’esclaircir les rouges marcheront:
De mort famille sera presque accablee,
Les rouges rouges le rouge assommeront.

0720
Le faux message par election feinte,
Courir par vrben rompue pache arreste:
Voix acheptee, de sang chappelle teinte,
Et à vn autre l’empire contraicte.

0721
Au port de Agde trois fustes entreront,
Portant l’infect, non foy & pestilence,
Passant le pont mil milles trembleront, [embleront]
Et le pont rompre à tierce resistance.

0722
Gorsan, Narbonne, par le sel aduertir
Tucham, la grande Parpignan trahie, [la grace]
La ville rouge n’y voudra consentir,
Par haute vol drap gris vie faillie.

0723
Lettres trouuees de la Royne les coffres,
Point de subscrit sans aucun nom [d’hauteur]: [d’autheur]
Par la police seront cachez les offre,
Qu’on ne sçaura qui sera l’amateur.

0724
Le lieutenant à l’entree de l’huys
Assommera le grand de Parpignan,
En se cuidant sauuer à Monpertuis,
Sera deceu bastard de Lusignan.

0725
Cœur de l’amant ouuert d’amour fortiue
Dans le ruisseau fera rauir la Dame:
Le demy mal contrefera lassiue,
Le pere à deux priuera corps de l’ame.

0726
De Caton és trouues en Barcelonne,
Mys decouuers lieu terrouers & ruyne,
Le grand qui tient ne tient voudra Pamplonne,
Par l’abbaye de Monferrat bruyne.

0727
La voye auxelle l’vne sur l’autre fornix
Du muy deser hor mis braue & genest,
L’escript d’Empereur le fenix
Veu à celuy ce qu’à nul autre n’est.

0728
Les simulachres d’or & d’argent enflez,
Qu’apres le rapt au feu furent iettez,
Au descouuert estaincts tous & troublez,
Au marbre escripts, prescrips intergetez.

0729
Au quart pillier lon sacre à Saturne,
Par tremblant terre & deluge fendu
Soubs l’edifice Saturnin trouuee vrne,
D’or Capion rauy & puis rendu.

0730
Dedans Tholouse non loing de Beluzer,
Faisant vn puys loing, palais d’espectacle
Thresor trouué vn chacun ira vexer,
Et en deux locz tout & pres delvasacle.

0731
Premier grand fruict le Prince de Pesquiere:
Mais puis viendra bien & cruel malin,
Dedans Venise perdra sa gloire fiere,
Et mis à mal par plus ioyue Celin.

0732
Garde toy Roy Gaulois de ton nepueu,
Qui sera tant que ton vnique fils
Sera meurtry à Venus faisant vœu:
Accompagné de nuict que trois & six.

0733
Le grand naistra de Veronne & Vincence,
Qui portera vn surnom bien indigne
Qui à Venise voudra faire vengeance,
Luy mesme prins homme du guet & signe.

0734
Apres Victoire du Lyon au Lyon
Sus la montaigne de Iura Secatombe
Delues & brodes septiesme million
Lyon, Vlme à Mansol mort & tombe.

0735
Dedans l’entree de Garone & Bayse
Et la forest non loing de Damazan
Du Marsaues gelees, puis gresle & bize
Dordonnois gelle par erreur de mesan.

0736
Sera commis conte oindre aduché
De Saulne & sainct Aulbin & Bell’œuure
Pauer de marbre de Tours loings espluché
Non Bleteram resister & chef d’œuure.

0737
La forteresse aupres de la Tamise
Cherra par lors le Roy dedans serré:
Aupres du pont sera veu en chemise
Vn deuant mort, puis dans le fort barré.

0738
Le Roy de Bloys dans Auignon regner
Vne autre fois le peuple emonopolle
Dedans le Rosne par murs fera baigner
Iusques à cinq le dernier près de Nolle.

0739
Qu’aura esté par Prince Bizantin,
Sera tollu par prince de Tholouses
La foy de Foix par le chef Tholentin
Luy faillira, ne refusant l’espouse.

0740
Le sang du Iuste par Taurer la daurade,
Pour se venger contre les Saturnins
Au nouueau lac plongeront la maynade,
Puis marcheront contre les Albanins.

0741
Esleu sera Renard ne sonnant mot,
Faisant le saint public viuant pain d’orge,
Tyrannizer apres tant à vn cop,
Mettant à pied des plus grands sur la gorge.

0742
Par auarice par force, & violence
Viendra vexer les siens chiefs d’Orléans,
Pres sainct Memire assaut & resistance
Mort dans sa tante diront qu’il dort leans.

0743
Par le decide de deux choses bastards,
Nepueu du sang occupera le regne,
Dedans lectoyre seront les coups de dards,
Nepueu par peur pliera l’enseigne.

0744
Le procree naturel dogmion,
De sept à neuf du chemin destorner:
A Roy de longue & amy au my hom.
Doit à Nauarre fort de Pav prosterner.

0745
La main escharpe & la iambe bandee,
Longs puis nay de Calais portera,
Au mot du guet la mort sera tardee,
Puis dans le temple à Pasque saignera.

0746
Pol mensolee mourra trois lieuës du rosne,
Fuis les deux prochains tarasc destrois:
Car Mars fera le plus horrible trosne,
De coq & d’aigle de France freres trois.

0747
Lac Transmenien portera tesmoignage,
Des coniurez sarez dedans Perouse
Vn despolle contrefera le sage:
Tuant Tedesque sterne & minuse.

0748
Saturne en Cancer, Iupiter auec Mars,
Dedans Fevrier Chaldondon salvaterre,
Sault Castallon assailly de trois pars,
Pres de Verbiesque conflit mortelle guerre.

0749
Satur au bœuf, ioüe en l’eau, Mars en fleiche,

[Saturne ] [Ioue]
Six de Feurier mortalité donra,
Ceux de Tardaigne à Bruge si grand breche,
Qu’à Ponteroso chef Barbarin mourra.

0750
La pestilence l’entour de Capadille,
Vne autre faim pres de Sagont s’appreste:
Le cheualier bastard de bon senille,
Au grand de Thunes fera trancher la teste.

0751
Le Bizantin faisant oblation,
Apres auoir Cordube à soy reprinse:
Son chemin long repos pamplation,
Mer passant proy par Colongna prinse.

0752
Le Roy de Bloys dans Auignon regner.
D’Amboise & Seme viendra le long de Lyndre:
Ongle à Poytiers sainctes aisles ruiner,
Deuant Bonieux viendra la guerre esteindre.

0753
Dedans Bolongne voudra lauer ses fautes,
Il ne pourra au temple du soleil:
Il volera faisant choses si hautes,
En hierarchie n’en fut oncq vn pareil.

0754
Soubs la couleur du traicté mariage,
Fait magnanime par grand Chyren selin:
Quintin, Arras recouurez au voyage
D’espagnols fait second banc macelin.

0755
Entre deux fleuues se verra enserré,
Tonneaux & caques vnis à passer outre:
Huict ponts rompus chef à tant enferré,
Enfans parfaicts sont iugulez en coultre.

0756
La bande foible le tertre occupera, [la terre]
Ceux du haut lieu feront horribles cris:
Le gros trouppeau d’estre coin troublera,
Tombe pres Dinebro descouuers les escris.

0757
De soldat simple paruiendra en empire,
De robbe courte paruiendra à la longue:
Vaillant aux armes en Eglise ou plus pyre,
Vexer les prestres comme l’eau fait l’esponge.

0758
Regne en querelle aux freres diuisé,
Prendre les armes & le nom Britannique:
Tiltre Anglican sera tard aduisé,
Surprins de nuict mener à l’air Gallique.

0759
Par deux foix haut par deux foix mis à bas,
L’orient aussi l’occident foyblira:
Son aduersaire apres plusieurs combats,
Par mer chasse au besoing faillira.

0760
Premier en Gaule, premier en Romanie,
Par mer & terre aux Anglois & Paris,
Merueilleux faits par celle grand mesnie,
Violant terax perdra le Norlaris.

0761
Iamais par le descouurement du iour,
Ne paruiendra au signe sceptrifere:
Que tous ses sieges ne soyent en seiour,
Portant au coq don du Tag armifere.

0762
Lors qu’on verra expiler le sainct temple,
Plus grand du rosne leurs sacrez prophaner
Par eux naistra pestilence si ample,
Roy fuit iniuste ne fera condamner.

0763
Quand l’adultere blessé sans coup aura,
Meurdry la femme & le fils par despit,
Femme assommee l’enfant estranglera:
Huict captifs prins, s’estouffer sans respit.

0764
Dedans les Isles les enfans transportez,
Les deux de sept seront en desespoir:
Ceux du terroüer en seront supportez,
Nom pelle prins des ligues fuy l’espoir.

0765
Le vieux frustré du principal espoir,
Il paruiendra au chef de son empire:
Vingt mois tiendra le regne à grand pouuoir,
Tiran, cruel en delaissant vn pire.

0766
Quand l’escriture D.M. trouuee,
Et caue antique à lampe descouuerte,
Loy, Roy, & Prince Vlpian esprouuee,
Pauillon Royne & Duc sous la couuerte.

0767
Par. Car. Nersaf, à ruine grand discorde,
Ne l’vn ne l’autre n’aura election,
Nersaf du peuple aura amour & concorde,
Ferrare, Collonne grande protection.

0768
Vieux Cardinal par le ieusne deceu,
Hors de sa charge se verra desarmé:
Arles ne monstres double soit apperceu,
Et liqueduct & le Prince embausmé.

0769
Aupres du ieune le vieux ange baisser,
Et le viendra surmonter à la fin:
Dix ans esgaux aux plus vieux rabaisser,
De trois deux l’vn huictiesme seraphin.

0770
Il entrera vilain meschant, infame
Tyrannisant la Mesopotamie
Tous amis fait d’adulterine dame,
Terre horrible noir de phisonomie.

0771
Croistra le nombre si grand des astronomes
Chassez, bannis & liures censurez.
L’An mil six cens & sept par sacre glomes,
Que nul aux sacres ne seront asseurez.

0772
Champ Perusin ô l’enorme deffaite,
Et le conflict tout aupres de Rauenne,
Passage sacre lors qu’on fera la feste.
Vainqueur vaincu cheual manger la venne.

0773
Soldat Barbare le grand Roy frappera,
Iniustement non esloigné de mort,
L’auare mere du fait cause sera,
Coniurateur & regne en grand [remort]. [temort]

0774
En terre neufue bien auant Roy entré,
Pendant subiets luy viendront faire acueil:
Sa perfidie aura tel rencontré,
Qu’aux citadins lieu de feste & recueil.

0775
Le pere & fils seront meurdris ensemble,
Le prefecteur dedans son pauillon:
La mere à Tours du fils ventre aura enfle,
Caiche verdure de fueilles papillon.

0776
Plus Macelin que Roy en Angleterre,
Lieu obscur nay par force aura l’empire:
Lasche sans foy sans loy saignera terre,
Son temps s’approche si pres que ie souspire.

0777
L’antechrist trois bien tost annichilez,
Vingt & sept ans sang durera sa guerre:
Les heretiques morts, captifs exilez,
Sang corps humain eau rougie gresler terre.

0778
Vn bragamas auec la langue torte,
Viendra des dieux [piller] le sanctuaire:
Aux heretiques il ouurira la porte,
En suscitant l’Eglise militaire.

0779
Qui par fer pere perdra nay de Nonnaire,
De Gorgon sur la sera sang perfetant:
En terre estrange fera si tout de taire,
Qui bruslera luy mesme & son enfant.

0780
Des innocens le sang de vefue & vierge,
Tant de maux faits par moyen se grand Roge:
Saints simulachres trempez en ardant cierge,
De frayeur crainte ne verra nul que boge.

0781
Le neuf empire en desolation,
Sera changé du pole aquilonaire:
De la Sicile viendra l’esmotion,
Troubler l’emprise à Philip. tributaire.

0782
Ronge long, sec faisant du bon valet,
A la parfin n’aura que son congie:
Poignant poyson, & lettres au collet,
Sera saisi eschappe en dangie.

0783
Le plus grand voile hors du port de Zara,
Pres de Bisance fera son entreprise:
D’ennemy perte & l’amy ne sera,
Le tiers à deux fera grand pille & prinse.

0784
Paterne orra de la Sicile crie,
Tous les aprests du goulphre de Trieste,
Qui s’entendra iusque à la trinacrie,
De tant de voiles fuy, fuy l’horrible peste.

0785
Entre Bayonne & saint Iean de Lux
Sera posé de Mars la promontoire
Aux Hanix d’Aquilon Nanar hostera lux,
Puis suffoqué au lict sans adiutoire.

0786
Par Arnani tholoser ville franque,
Bande infinie par le mont Adrian:
Passe riuiere, Hutin par pont la planque
Bayonne entrer tous Bichoro criant.

0787
Mort conspiree viendra en plain effect,
Charge donnee & voyage de mort:
Esleu, cree receu par siens deffait.
Sang d’innocent deuant foy par remort.

0788
Dans la Sardeigne vn noble Roy viendra,
Qui ne tiendra que trois ans le royaume.
Plusieurs couleurs auec soy conioindra,
Luy mesme apres soin sommeil marrit scome.

0789
Pour ne tomber entre mains de son oncle,
Qui ses enfants par regner trucidez:
Orant au peuple mettant pied sur Peloncle
Mort & traisné entre cheuaux bardez.

0790
Quand des croisez vn trouué de sens trouble,
En lieu du sacre verra vn bœuf cornu:
Par vierge porc son lieu lors sera comble,
Par Roy plus ordre ne sera soustenu.

0791
Parmy les champs des Rodanes entrees
Où les croysez seront presques unys,
Les deux brassières en pisces rencontrées
Et vn grand nombre par deluge punis.

0792
Loing hors du regne mis en hazard voyage
Grand ost duyra pour soy l’occupera,
Le Roy tiendra les siens captif ostage
A son retour tout pays pillera.

0793
Sept moys sans plus obtiendra prelature
Par son decez grand scisme fera naistre:
Sept moys tiendra vn autre la preture
Pres de Venise paix, vnion renaistre.

0794
Deuant le lac où plus cher fut getté
De sept mois, & son ost desconfit
Seront Hispans par Albanois gastez,
Par delay perte en donnant le conflict.

0795
Le seducteur sera mis en la fosse,
Et estaché iusques à quelque temps,
Le clerc vny le chef auec sa crosse:
Pycante droite attraira les contens.

0796
La synagogue sterile sans nul fruit
Sera receue entre les infideles,
De Babylon la fille du porsuit:
Misere & triste luy trenchera les aisles.

0797
Aux fins du Var changer les pompotans,
Pres du riuage les trois beaux enfants naistre:
Ruyne au peuple par aage competans,
Regne au pays changer plus voir croistre.

0798
Des gens d’Eglise sang sera espanché,
Comme de l’eau en si grand abondance:
Et d’vn long temps ne sera restanché, [restranché]
Ve ve au clerc ruyne & doleance.

0799
Par la puissance des trois Rois temporels,
En autre lieu sera mis le sainct Siege:
Où la substance de l’esprit corporel,
Sera remis & receu pour vray siege.

0800
Pour l’abondance de larme respandue,
Du haut en bas par le bas au plus haut:
Trop grande foy par ieu vie perdue,
De soif mourir par abondant defaut.