0801
Dans la maison du traducteur de Bourc,
Seront les lettres trouuees sur la table,
Borgne, roux, blanc, chanu tiendra de cours,
Qui changera au nouueau Connestable.

0802
Du haut du mont Auentin voix ouye,
Vuydez vuydez de tous les deux costez:
Du sang des rouges sera l’ire assomye,
D’Arimin Prato, Columna debotez.

0803
La magna vaqua à Rauenne grand trouble,
Conduicts par quinze enserrez à Fornase:
A Rome naistra deux monstres à teste double
Sang, feu, deluge, les plus grands à l’espase.

0804
L’an ensuyuant découuerts par deluge,
Deux chefs esleuz, le premier ne tiendra
De fuyr ombre à l’vn d’eux le refuge,
Saccagee case qui premier maintiendra.

0805
Tiers doigt du pied au premier semblera
A vn nouueau monarque de bas haut,
Qui Pyse & Luques Tyran occupera
Du precedent corriger le deffaut.

0806
Par la Guyenne infinité d’Anglois
Occuperont par nom d’Anglaquitaine,
Du Languedoc Ispalme Bourdeloys,
Qu’ils nommeront apres Barboxitaine.

0807
Qui ouurira le monument trouué,
Et ne viendra le serrer promptement,
Mal luy viendra, & ne pourra prouué
Si mieux doit estre Roy Breton ou Normand.

0808
Puisnay Roy fait son pere mettra à mort, [mettre]
Apres conflict de mort tres-inhonneste:
Escrit trouué, soupçon donra remort,
Quand loup chassé pose sur la couchette.

0809
Quand lampe ardente de feu inextinguible
Sera trouué au temple des Vestales.
Enfant trouué feu, eau passant par crible:
Perir eau Nymes, Tholose cheoir les halles.

0810
Moyne moynesse d’enfant mort exposé,
Mourir par ourse, & rauy par verrier,
Par Fois & Pamyes le camp sera posé
Contre Tholose Carcas dresser forrier.

0811
Le iuste à tort à mort l’on viendra mettre
Publiquement et du milieu esteint:
Si grande peste en ce lieu viendra naistre,
Que les iugeans fuyr seront contraints.

0812
Le tant d’argent de Diane & Mercure,
Les simulachres au lac seront trouuez:
Le figulier cherchant argille neuue
Lui & les siens d’or seront abbreuuez.

0813
Les exilez autour de la Soulongne
Conduits de nuict pour marcher en Lauxois,
Deux de Modenne truculent de Bolongne,
Mis descouuerts par feu de Burançois.

0814
Mis en planure chauderons d’infecteurs,
Vin, miel & huyle & bastis sur forneaux
Seront plongez, sans mal dit malfacteurs
Sept fum extaint au canon des borneaux.

0815
Pres de Parpan les rouges detenus,
Ceux du milieu parfondres menez loing:
Trois mis en pieces, & cinq mal soustenus,
Pour le Seigneur & Prelat de Bourgoing.

0816
De castel Franco sortira l’assemblee,
L’ambassadeur non plaisant fera scisme:
Ceux de Ribiere seront en la meslee,
Et au grand goulfre desnieront l’entree.

0817
Le tiers premier pis que ne fit Neron,
Vuidez vaillant que sang humain respandre:
Rédifier fera le forneron,

Siecle d’or mort, nouueau Roy grand esclandre.

0818
Le lys Dauffois portera dans Nansi,
Iusques en Flandres electeur de l’Empire
Neufue obturee au grand Montmorency,
Hors lieux prouuez deliure à clere peyne.

0819
Dans le milieu de la forest Mayenne,
Sol au Lyon la fouldre tombera:
Le grand bastard yssu de grand du Maine,
Ce iour fougeres pointe en sang entrera.

0820
De nuict viendra par la forest de Reines,
Deux pars vaultorte Herne la pierre blanche.
Le moyne noir en gris dedans Varennes,
Esleu cap. cause tempeste, feu, sang, tranche.

0821
Au temple haut de Bloys sacre Salonne,
Nuict pont de Loyre Prelat, Roy pernicant:
Curseur victoire aux marests de la lone,
D’où prelature de blancs à bormeant. [alormeant]

0822
Roy & sa cour au lieu de langue halbe,
Dedans le temple vis à vis du palais:
Dans le iardin Duc de Mantor & d’Albe,
Albe & Mantor poignard langue & palais.

0823
Puisnay ioüant au fresch dessoubs la tonne,
Le haut du toict du milieu sur la teste,
Le pere Roy au temple saint Salonne,
Sacrifiant sacrera fum de feste.

0824
Sur le palais au rochier des fenestres,
Seront rauis les deux petits royaux:
Passer aurelle Luthece, Denis cloistres,
Nonnain, Mallods aualler verts noyaux.

0825
Passant les ponts venir pres des rosiers,
Tard arriué plustost qu’il cuidera,
Viendront les noues Espagnols à Besiers,
Qui icelle chasse emprinse cassera. [Qu'icelle]

0826
Nice sortie sur nom des lettres aspres,
La grande cappe fera present non sien :
Proche de vultry aux murs de vertes capres,
Apres plombin le vent à bon essien.

0827
De bois la garde, vent clos ronds pont sera,
Haut le receu frappera le Dauphin,
Le vieux teccon bois vnis passera,
Passant plus outre du Duc le droit confin.

0828
Voile Symacle port Massiliolique,
Dans Venise port marcher aux Pannons:
Partir du goufre & sinus Illirique,
Vast à Socile, Ligurs coups de canons.

0829
Lors que celuy qu’à nul ne donne lieu,
Abandonner voudra lieu prins non prins:
Feu nef par saignes, bitument à Charlieu,
Seront Quintin Balez reprins.

0830
Au port de Puola & de sainct Nicolas,
Perir Normande au goufre Phanatique,
Cap. de Bisance rues crier helas,
Secours de Gaddes & du grand Philippique.

0831
Le tremblement de terre à Mortara,
Cassich sainct George à demy perfondrez:
Paix assoupie la guerre esueillera,
Dans temple à Pasques abysmes enfondrez.

0832
De fin porphire profond collon trouuee
Dessouz la lauze escripts capitolin:
Os poil retors Romain force prouuee,
Classe agiter au port de Methelin.

0833
Hercules Roy de Rome & d’Annemarc,
De Gaule trois Guion surnommé,
Trembler l’Italie & l’vnde de sainct Marc,
Premier sur tous monarque renommé.

0834
Le part soluz mary sera mitré,
Retour conflict passera sur le thuille:
Par cinq cens vn trahyr sera tiltré
Narbon & Saulce par coutaux auons d’huille.

0835
Et Ferdinand blonde sera descorte, [deserte]
Quitter la fleur, suiure le Macedon,
Au grand besoin defaillira sa routte,
Et marchera contre le Myrmidon.

0836
Vn grand Roy prins entre les mains d’vn loyne,
Non loin de Pasque confusion coup cultre:
Perpet, captifs temps que foudre en la husne,
Lors que trois freres se blesseront & murtre.

0837
Pont & moulins en Decembre versez,
En si haut lieu montera la Garonne:
Meurs, edifices, Tolose renuersez,
Qu’on ne sçaura son lieu autant matronne.

0838
L’entree de Blaye par Rochelle & l’Anglois,
Passera outre le grand Aemathien:
Non loin d’Agen attendra le Gaulois,
Secours Narbonne deceu par entretien.

0839
En Arbissel à Vérone & Carcari,
De nuict conduits par Sauonne attraper,
Le vif Gascon Turby, & la Scerry:
Derrier mur vieux & neuf palais gripper.

0840
Pres de Quintin dans la forest bourlis,
Dans l’Abaye seront Flamens tranchés:
Les deux puisnais de coups my estourdis,
Suitte oppressee & gardes tous achés.

0841
Le grand Chyren soy saisir d’Auignon,
De Rome lettres en miel plein d’amertume
Lettre ambassade partir de Chanignon,
Carpentras pris par duc noir rouge plume.

0842
De Barcellonne, de Gennes & Venise
De la Secille peste Monet vnis:
Contre Barbare classe prendront la vise,
Barbar poussé bien loing iusqu’à Thunis.

0843
Proche à descendre l’armee Crucigere,
Sera guettee par les Ismaëlites,
De tous costez batus par nef Rauiere,
Prompt assaillis de dix galeres eslites.

0844
Migrés, migrés de Geneue trestous,
Saturne d’or en fer se changera:
Le contre Raypoz exterminera tous,
Auant l’aduent le ciel signes fera.

0845
Ne sera soul iamais de demander,
Grand Mendosus obtiendra son empire:
Loing de la cour fera contremander
Pymond, Picard, Paris Tyrron le pire.

0846
Vuydez fuyez de Tolose les rouges,
Du sacrifice faire expiation.
Le chef du mal dessous l’ombre des courges:
Mort estrangler carne omination.

0847
Les soulz signez d’indigne deliurance,
Et de la multe auront contre aduis:
Change monarque mis en perille pence,
Serrez en cage se verront vis à vis.

0848
La grand cité d’Occean maritime,
Enuironnee de marets en cristal:
Dans le solstice hyemal & la prime,
Sera tentee de vent espouuantal.

0849
Gand & Bruceles marcheront contre Anuers,
Senat de Londres mettront à mort leur Roy.
Le sel & vin luy seront à l’enuers,
Pour eux auoir le regne en desarroy.

0850
Mendosus tost viendra à son haut règne,
Mettant arrière vn peu les Norlaris :
Le rouge blesme, le masle à l’interrègne,
Le ieune crainte & frayeur Barbaris.

0851
Contre les rouges sectes se banderont,
Feu, eau, fer, corde par paix se minera:
Au point mourir ceux qui machineront,
Fors vn que monde sur tout ruinera.

0852
La paix s’approche d’vn costé, & la guerre,
Oncques ne fut la poursuitte si grande:
Plaindre homme, femme sang innocent par terre,
Et ce sera de France a toute bande.

0853
Le Neron ieune dans les trois cheminees,
Fera de paiges vifs pour ardoir ietter:
Heureux qui loing sera de tels menees,
Trois de son sang le feront mort guetter.

0854
Arriuera au port de Corsibonne,
Pres de Rauenne, qui pillera la dame:
En mer profonde legat de la Vlisbonne,
Sous roc cachez rauiront septante ames.

0855
L’horrible guerre qu’en Occident s’appreste,
L’an ensuiuant viendra la pestilence,
Si fort horrible que ieune, vieux, ne beste,
Sang, feu, Mercure, Mars, Iupiter en France.

0856
Camp pres de Noudam passera Goussan ville,
Et à Maiores laissera son enseigne:
Conuertira en instant plus de mille,
Cherchant les deux remettre en chaine & legne.

0857
Au lieu de Drvx vn Roy reposera,
Et cherchera loy changeant d’Anatheme:
Pendant le ciel si tresfort tonnera,
Portée neufue Roy tuera soy mesme.

0858
Au costé gauche à l’endroit de Vitry,
Seront guettez les trois rouges de France:
Tous assommez rouge, noir non meurdry,
Par les Bretons remis en asseurance.

0859
A la Ferté prendra la Vidame,
Nicol tenu rouge qu’auoit produit la vie:
La grand Loyse naistra que fera clame,
Donnant Bourgongne à Bretons par enuie.

0860
Conflict Barbar en la [Cornere] noire, [Cornette]
Sang espandu, trembler la Dalmatie,
Grand Ismael mettra son promontoire,
Ranes trembler secours Lusitanie.

0861
La pille faicte à la coste marine,
In cita noua & parens amenez.
Plusieurs de Malte par le fait de Messine,
Estroit serrez seront mal guerdonnez.

0862
Au grand de Cheramon agora,
Seront croisez par ranc tous attachez,
Le pertinax Oppi, & Mandragora,
Raugon d’Octobre le tiers seront laschez.

0863
Plainctes & pleurs cris, & grands hurlemens
Pres de Narbon a Bayonne & en Foix,
O quels horribles calamitez changemens,
Auant que Mars reuolu quelquesfois.

0864
L’Æmathion passer monts Pyrennées,
En Mars Narbon ne fera resistance,
Par mer & terre fera si grand menee,
Cap. n’ayant terre seure pour demeurance.

0865
Dedans le coing de Luna viendra rendre
Où sera prins & mis en terre estrange,
Les fruicts immeurs seront à grand esclandre,
Grand vitupere, à l’vn grande loüange.

0866
Paix, vnion sera & changement,
Estats, offices bas haut & haut bien bas
Dresser voyage, le fruict premier tourment,
Guerre cesser, ciuil proces debats.

0867
Du haut des monts à l’entour de Lizere
Port à la roche Valent cent assemblez
De Chasteauneuf Pierre late en donzere,
Contre le Crest Romans foy assemblez.

0868
Du mont Aymar sera noble obscurcie,
Le mal viendra au ioinct de Saone & Rosne:
Dans bois cachez soldats iour de Lucie
Qui ne fut onc vn si horrible throsne.

0869
Sur le mont de Bailly & la Bresle
Seront cachez de Grenoble les fiers
Outre Lyon, Vien eux si grand gresle.
Langoult en terre n’en restera vn tiers.

0870
Harnois tranchant dans les flambeaux cachez,
Dedans Lyon, le iour du Sacrement,
Ceux de Vienne seront trestous hachez,
Par les cantons Latins Mascon ne ment.

0871
Aux lieux sacrez animaux veu à trixe,
Auec celuy qui n’osera le iour.
A Carcassonne pour disgrace propice,
Sera posé pour plus ample seiour.

0872
Encor seront les saincts temples pollus,
Et expilles par Senat Tholosain,
Saturne deux trois cicles reuollus.
Dans Auril, May, gens de nouueau leuain.

0873
Dans Fois entrez Roy cerulée Turban:
Et regnera moins euolu Saturne,
Roy Turban blanc Bizance cueur ban,
Sol, Mars, Mercure pres la hurne.

0874
Dans la cité de Fertsod homicide,
Fait, & fait multe beuf arant ne macter,
Retours encores aux honneurs d’Artemide
Et à Vulcan corps morts sepulturer.

0875
De l’Ambraxie & du pays de Thrace
Peuple par mer, mal, & secours Gaulois,
Perpetuelle en prouence la trace,
Auec vestige de leurs coustume & loix.

0876
Auec le noir Rapax & sanguinaire,
Yssu du peaultre de l’inhumain Neron,
Emmy deux fleuues main gauche militaire,
Sera meurtry par Ioyne chaulueron.

0877
Le regne prins le Roy [conuicra] [coniurera]
La dame prinse à mort iurez à sort,
La vie à Royne fils on desniera,
Et la pellix au fort de la consort.

0878
La dame Grecque de beauté laydique,
Heureuse faicte de procs innumerable,
Hors translatee au regne Hispanique,
Captiue prinse mourir mort miserable.

0879
Le chef de classe par fraude stratageme,
Fera timides sortir de leurs Galleres,
Sortis meurtris chef renieur de cresme,
Puis par l’embusche luy rendront le saleres.

0880
Le Duc voudra les siens exterminer,
Enuoyera les plus forts lieux estranges:
Par tyrannie Bize & Luc ruiner,
Puy les Barbares sans vin feront vendanges.

0881
Le Roy rusé entendra ses embusches,
De trois quartiers ennemis assaillir:
Vn nombre estrange larmes de coqueluches,
Viendra Lemprin du traducteur faillir.

0882
Par le deluge & pestilence forte,
La cité grande de long temps assiegee:
La sentinelle & garde de main morte,
Subite prinse, mais de nulle outragee.

0883
Sol vingt de Taurus si fort terre trembler,
Le grand theatre remply ruinera:
L’air, ciel & terre obscurcir & troubler,
Lors l’infidelle Dieu & saincts voguera.

0884
Roy exposé parfera l’hecatombe,
Apres auoir trouué son origine:
Torrent ouurir de marbre & plomb la tombe,
D’vn grand Romain d’enseigne Medusine.

0885
Passer Guienne, Languedoc & le Rosne,
D’Agen tenant de Marmande & la Roolle:
D’ouurir par foy parroy, Phocen tiendra son trosne
Conflict aupres saint Pol de Manseole.

0886
De bourg Lareyne parviendront droit à Chartres
Et feront pres du pont Anthoni pause,
Sept pour la paix cauteleux comme Martres,
Feront entree d’armee à Paris clause.

0887
Par la forest du Touphon essartee,
Par hermitage sera posé le temple,
Le Duc d’Estampes par sa ruse inuentee.
Du mont Lehori prelat donra exemple.

0888
Calais Arras, secours à Theroanne,
Paix & semblant simulera l’escoutte,
Soulde d’Alobrox descendre par Roane.
Destornay peuple qui defera la routte.

0889
Sept ans sera Philipp. fortune prospere,
Rabaissera des Arabes l’effort,
Puis son midy perplex rebors affaire
Ieune ognion abismera son fort.

0890
Vn capitaine de la Grand Germanie
Se viendra rendre par simulé secours
Au Roy des Roys aide de Pannonie,
Que sa reuolte fera de sang grand cours.

0891
L’horrible peste Perynthe & Nicopolle,
Le Chersonnez tiendra & Marceloyne,
La Thessalie vastera l’Amphipolle,
Mal incogneu, & le refus d’Anthoine.

0892
Le Roy voudra en cité neufue entrer,
Par ennemis expugner l’on viendra
Captif libere faux dire & perpetrer,
Roy dehors estre, loin d’ennemis tiendra.

0893
Les ennemis du fort bien esloignez,
Par chariots conduict le bastion.
Par sur les murs de Bourges esgrongnez
Quand Hercules battra l’Hæmathion. [bastira]

0894
Foibles galeres seront vnies ensemble,
Ennemis faux le plus fort en rampart:
Foibles assaillies Vratislaue tremble,
Lubecq & Mysne tiendront barbare part.

0895
Le nouueau faict conduira l’exercite,
Proche apamé iusqu’aupres du riuage:
Tendant secours de Millannoile eslite,
Duc yeux priué à Milan fer de cage.

0896
Dans cité entrer exercit desniee,
Duc entrera par persuasion,
Aux foibles portes clam armee amenee,
Mettront feu, mort, de sang effusion.

0897
De mer copies en trois pars diuisées,
A la seconde les viures failliront,
Desesperez cherchant champs Helisees,
Premiers en breche entrez victoire auront.

0898
Les affligez par faute d’vn seul taint,
Contremenant à partie opposite,
Aux Lygonnois mandera que contraint
Seront de rendre le grand chef de Molite.

0899
Vent Aquilon fera partir le siege,
Par meurs ietter cendres, chaux, & poussiere:
Par pluye apres, qui leur fera bien piege,
Dernier secours encontre leur frontiere.

0900
Naualle pugne nuit sera superee,
Le feu aux naues à l’Occident ruine:
Rubriche neufue, la grand nef coloree,
Ire à vaincu, & victoire en bruine.