0901
A l’ennemy, l’ennemy foy promise
Ne se tiendra, les captifs retenus:
Prins preme mort, & le reste en chemise.
Damné le reste pour estre soustenus.

0902
Voille gallere voil de nef cachera,
La grande classe viendra sortir la moindre,
Dix naues proches le tourneront pousser,
Grande vaincue vnies à soy ioindre.

0903
En apres cinq troupeaux ne mettra hors
Vn fuitif pour Penelon laschera,
Faux murmurer, secours venir par lors, [vnir]
Le chef le siege lors abandonnera.

0904
Sur la minuict conducteur de l’armee
Se sauuera subit esuanouy,
Sept ans apres la fame non blasmee,
A son retour ne dira onc ouy.

0905
Albi & Castres feront nouuelle ligue,
Neuf Arriens Lis bon & Portugues,
Carcas, Tholouse consumeront leur brigue,
Quand chef neuf monstre [istra] de Lauragues.

0906
Sardon Nemaus si haut deborderont,
Qu’on cuidera Deucalion renaistre.
Dans le collosse la plus part fuyront,
Vesta sepulchre feu esteint apparoistre.

0907
Le grand conflit qu’on appreste à Nancy,
L’Æmathien dira tout ie soubmets,
L’Isle Britanne par vin sel en soucy: [solcy]
Hem, mi. deux Phi. long temps ne tiendra Mets.

0908
Index & poulse parfondera le front,
De Senegalia le Comte à son fils propre,
La Myrnamee par plusieurs de prin front,
Trois dans sept iours blessés morts.

0909
De Castillon figuieres iour de brune,
De femme infame naistra souuerain Prince:
Surnom de chausses perhume luy posthume,
Onc Roy ne fut si pire en sa prouince.

0910
Tasche de meurdre, enormes adulteres,
Grand ennemy de tout le genre humain:
Que sera pire qu’ayeuls, oncles ne peres,
Enfer, feu, eaux, sanguin & inhumain.

0911
Dessous Ionchere du dangereux passage,
Fera passer le posthume sa bande.
Les monts Pyrens passer hors son bagage,
De Parpignan courira duc à Tende.

0912
Esleu en pape, d’esleu sera mocqué,
Subit soudain esmeu prompt & timide,
Par trop bon doux à mourir prouoqué,
Crainte esteinte la nuict de sa mort guide.

0913
Souz la pasture d’animaux ruminant,
Par eux conduicts au ventre herbipolique, [helbipolique]
Soldats cachez, les armes bruit menant,
Non loin temptez de cité Antipolique.

0914
Vrnel Vaucile sans conseil de soy-mesme,
Hardi, timide, par crainte prins vaincu,
Accompagné de plusieurs putains blesmes.
A Barcellonne aux Chartreux conuaincu.

0915
Pere duc vieux d’ans & de soif chargé,
Au iour extreme fils desniant l’esguiere,
Dedans le puits vif mort viendra plongé,
Senat au fil la mort longue et legere.

0916
Heureux au regne de France, heureux de vie,
Ignorant sang, mort fureur & rapine:
Par non flateurs sera mis en enuie,
Roy desrobé, trop de foy en cuisine.

0917
La Royne Ergaste voyant sa fille blesme, [estrange]
Par vn regret dans l’estomach enclos:
Cris lamentables seront lors d’Angolesme,
Et au germain mariage fort clos. [forclos]

0918
Le rang Lorrain fera place à Vendosme,
Le haut mis bas, & le bas mis en haut,
Le fils d’Hamon sera esleu dans Rome,
Et les deux grands seront mis en defaut.

0919
Iour que sera par Royne saluee,
Le iour après le Salut, la Priere:
Le compte fait raison & valbuee,
Parauant humble oncques ne fut si fiere.

0920
Tous les amis qu’auront tenu party,
Pour rude en lettres mis mort & saccagé,
Biens publiez par fixe grand neanty,
Onc Romain peuple ne fut tant outragé.

0921
Par le despit du Roy soustenant moindre,
Sera meurdry luy presentant les bagues:
Le pere au fils voulant noblesse poindre,
Fait comme à Perse jadis firent les Magues.

0922
Pour ne vouloir consentir au diuorce,
Qui puis apres sera cogneu indigne:
Le Roy des isles sera chassé par force,
Mis à son lieu qui de roy n’aura signe.

0923
Au peuple ingrat faictes les remonstrances.
Par lors l’armee se saisira d’Antibe,
Dans l’arc Monech feront les doleances,
Et à Freius l’vn l’autre prendra ribe.

0924
Le captif prince aux Itales vaincu
Passera Gennes par mer iusqu’à Marceille,
Par grand effort des forains suruaincu
Sauf coup de feu, barril liqueur d’abeille.

0925
Par Nebro ouurir de Bisanne passage,
Bien esloignez el tago fara muestra,
Dans Pelligouxe sera commis l’outrage,
De la grand dame assise sur l’orchestra.

0926
Le successeur vengera son beau frere,
Occuper regne souz ombre de vengeance,
Occis ostacle son sang mort vitupere,
Long temps Bretaigne tiendra auec la France.

0927
Car le cinquiesme & vn grand Hercules [Par]
Viendront le temple ouvrir de main bellique,
Vn Clement, Iule & Ascans recules,
Lespe, clef, aigle, n’eurent onc si grand picque. [L’espee]

0928
Second & tiers qui font prime musique
Sera par Roy en honneur sublimee,
Par grasse & maigre presque demy eticque
Rapport de Venus faux rendra deprimee.

0929
De Pol Mansol dans cauerne caprine
Caché & prins extrait hors par la barbe,
Captif mené comme beste mastine
Par Bergourdans amenee pres de Tarbe.

0930
Nepueu & sang du sainct nouueau venu,
Par le surnom soustient arcs & couuert
Seront chassez mis à mort chassez nu,
En rouge & noir conuertiront leur vert.

0931
Le sainct Empire viendra en Germanie
Ismaëlites trouueront lieux ouuerts,
Asnes voudront aussi la Carmanie
Les soustenans de terre tous couuerts.

0932
Le grand empire chacun an deuoit estre,
Vn sur les autres le viendra obtenir:
Mais peu de temps sera son reigne & estre,
Deux ans aux naues se pourra soustenir.

0933
La faction cruelle à robe longue,
Viendra cacher souz les pointus poignards,
Saisir Florence le Duc & lieu diphlongue,
Sa descouuerte par immeurs & flaugnards.

0934
Gaulois qu’empire par guerre occupera,
Par son beau frere mineur sera trahy:
Par cheual rude voltigeant trainera.
Du fait le frere long temps sera hay.

0935
Puisnay royal flagrand d’ardant libide,
Pour se iouyr de cousine germaine:
Habit de femme au temple d’Artemide,
Allant meurdry par incognu de Marne. [du Maine]

0936
Apres le Roy du soucq guerres parlant,
L’Isle Harmotique le tiendra à mespris:
Quelques ans bons rongeant vn & pillant,
Par tyrannie à l’isle changeant pris.

0937
L’assemblee grande pres du lac de Borget,
Se ralieront pres de Montmelian:
Marchans plus outre pensifs feront progret
Chambry, Moraine combat sainct Iulian.

0938
Amour allegre non loing pose le siege.
Au sainct barbar seront les garnisons:
Vrsins Hadrie pour Gaulois feront plaige,
Pour peur rendus de l’armee aux Grisons.

0939
Premier fils vefue malheureux mariage,
Sans nuls enfans deux Isles en discord:
Auant dixhuict incompetant eage,
De l’autre pres plus bas sera l’accord.

0940
Le ieune nay au regne Britannique,
Qu’aura le pere mourant recommandé,
Iceluy mort Lonole donra topique,
Et à son fils le regne demandé.

0941
En la frontiere de Caussa & de Charlus,
Non guieres loing du fonds de la valee:
De ville franche musique à son de luths,
Enuironnez combouls & grand mittee.

0942
Le regne humain d’Anglique geniture,
Fera son regne paix vnion tenir:
Captiue guerre demy de sa closture,
Long temps la paix leur fera maintenir.

0943
Le trop bon temps trop de bonté royale,
Fais & deffaits, prompt, subit, negligence.
Legier croira faux d’espouse loyalle,
Luy mis à mort par sa beneuolence.

0944
Par lors qu’vn Roy sera contre les siens,
Natif de Bloys subiuguera Ligures,
Mammel, Cordube & les Dalmatiens,
De sept puis l’ombre à Roy estrennes et lemures.

0945
L’ombre du regne de Nauarre non vray,
Fera la vie de sort illegitime:
La veu promis incertain de Cambray,
Roy Orleans donra mur legitime.

0946
Vie sort mort de l’or vilaine indigne, [soit]
Sera de Saxe non nouueau electeur:
De Brunsuic mandra d’amour signe,
Faux le rendant au peuple seducteur.

0947
De bourze ville à la dame Guyrlande,
L’on mettra sur par la trahison faicte
Le grand Prelat de Leon par Formande,
Faux pelerins et rauisseurs deffaicte.

0948
Du plus profond de l’Espaigne enseigne,
Sortant du bout & des fins de l’Europe,
Troubles passant aupres du pont de Laigne,
Sera deffaicte par bande sa grand troupe.

0949
Iardin du monde aupres de cité neufue,
Dans le chemin des montaignes cauees:
Sera saisi & plongé dans la Cuue,
Beuuant par force eaux soulphre enuenimees.

0950
La Meuse au iour terre de Luxembourg,
Descouurira Saturne & trois en lurne:
Montaigne & pleine, ville cité & bourg,
Lorrain deluge, trahison par grand hurne.

0951
Des lieux plus bas du pays de Lorraine
Seront des basses Allemaignes vnis:
Par ceux du siege Picards, Normans, du Maine,
Et aux cantons se seront reünis.

0952
Au lieu où Laye & Scelde se marient,
Seront les nopces de long temps maniees:
Au lieu d’Anuers où la crappe charient,
Ieune viellesse consorte intaminee.

0953
Les trois pelices de loing s’entrebatront,
La plus grand moindre demeurera à l’escoute:
Le grand Selin n’en sera plus patron,
Le nommera feu pelte blanche routte.

0954
Nee en ce monde par concubine fertiue,
A deux haut mise par les tristes nouuelles,
Entre ennemis sera prinse captiue,
Et amenee à Malings & Bruxelles.

0955
Les malheureuses nopces celebreront
En grande ioye mais la fin malheureuse,
Mary & mere nore desdaigneront,
Le Phybe mort, & nore plus piteuse.

0956
Prelat royal son baissant trop tiré,
Grand fleux de sang sortira par sa bouche,
Le regne Angelicque par regne respiré,
Long temps mort vifs en Tunis comme souche.

0957
Le subleué ne cognoistra son sceptre,
Les enfans ieunes des plus grands honnira:
Oncques ne fut vn plus ord cruel estre,
Pour leurs espouses à mort noir bannira.

0958
Au temps du dueil que le felin monarque
Guerroyera le ieune Æmathien:
Gaule bransler, pericliter la barque,
Tenter Phossens au Ponant entretien.

0959
Dedans Lyon vingtcinq d’vne haleine,
Cinq citoyens Germains, Bressans, Latins:
Par dessous noble conduiront longue traine.
Et descouuers par abbois de mastins.

0960
Ie pleure Nisse, Mannego, Pize, Gennes,
Sauonne, Sienne, Capuë Modene, Malte:
Le dessus sang, & glaiue par estrennes,
Feu, trembler terre, eau. malheureuse nolte.

0961
Betta, Vienne, Emorte, Sacarbance,
Voudront liurer aux Barbares Pannone:
Par picque & feu enorme violance,
Les coniurez descouuers par matrone.

0962
Pres de Sorbin pour assaillir Ongrie,
L’heraut de Brudes les viendra aduertir:
Chef Bisantin, Sallon de Sclauonie,
A loy d’Arabes les viendra conuertir.

0963
Cydron, Raguse, la cité au sainct Hieron
Reuerdira le medicant secours:
Mort fils de Roy par mort de deux heron,
L’Arabe, Hongrie feront vn mesme cours.

0964
Pleure Milan, pleure Luques, Florence,
Que ton grand Duc sur le char montera,
Changer le siege pres de Venise s’aduance,
Lors que Colonne à Rome changera.

0965
O vaste Rome, ta ruyne s’approche,
Non de tes murs, de ton sang & substance
L’aspre par lettres fera si horrible coche
Fer pointu mis à tous iusques au manche.

0966
Le chef de Londres par regne l’Americh,
L’Isle d’Escosse tempiera par gelee:
Roy Reb auront vn si faux Antechrist,
Que les mettra trestous dans la meslee.

0967
Le tremblement si fort au mois de may,
Saturne, Caper, Iupiter, Mercure au bœuf:
Venus aussi, Cancer, Mars en Nonnay,
Tombera gresle lors plus grosse qu’vn œuf.

0968
L’armee de mer deuant cité tiendra,
Puis partira sans faire longue allee:
Citoyens grande proye en terre prendra,
Retourner classe prendre grande emblee.

0969
Le fait luysant de neuf vieux esleué,
Seront si grand par Midy, Aquilon:
De sa sœur propre grandes asles leué,
Fuyant meurdry au buisson d’Ambellon.

0970
L’œil par obiect fera telle excroissance,
Tant & ardante que tombera la neige :
Champ arrousé viendra en decroissance,
Que le primat succombera à Rege.

0971
La terre & l’air geleront si grand eau,
Lors qu’on viendra pour Ieudy venerer:
Ce qui sera iamais ne fut si beau,
Des quatre parts le viendront honorer.

0972
L’an mil neuf cens nonante neuf sept mois,
Du ciel viendra un grand Roy d’effrayeur:
Resusciter le grand Roy d’Angolmois,
Auant apres Mars regner par bon-heur.

0973
Le temps present auecques le passé,
Sera iugé par grand Iouialiste:
Le monde tard luy sera lassé,
Et desloyal par le clergé iuriste.

0974
An reuolu du grand nombre septiesme, [Au]
Apparoistra au temps ieux d’Hecatombe:
Non esloigné du grand aage milliesme,
Que les entrez sortiront de leur tombe.

0975
Tant attendu ne reuiendra iamais,
Dedans l’Europe en Asie apparoistra:
Vn de la ligue yssu du grand Hermes,
Et sur tous Roys des Orients croistra.

0976
Le grand Senat discernera la pompe,
A l’vn qu’apres sera vaincu chassé:
Ses adherans seront à son de trompe
Biens publiez, ennemis dechassez.

0977
Trente adherans de l’ordre des quirettes
Bannis, leurs biens donnez ses aduersaires:
Tous leurs bienfaits seront pour demerites,
Classe espargie deliurez aux Corsaires.

0978
Subite ioye en subite tristesse,
Sera à Rome aux graces embrassees:
Dueil, bris, pleurs. larm. sang, excellent liesse [cris]
Contraires bandes surprinses & troussees.

0979
Les vieux chemins seront tous embellys,
L’on passera à Memphis somentree:
Le grand Mercure d’Hercules fleur de lys,
Faisant trembler terre, mer & contree.

0980
Au regne grand du grand regne regnant,
Par force d’armes les grands portes d’airain:
Fera ouurir, le Roy & Duc ioignant,
Port demoly, nef à fons, iour serain. [Fort]

0981
Mis tresors temple citadins Hesperiques,
Dans iceluy retiré en secret lieu:
Le temple ouurir les liens fameliques,
Reprens, rauis, proye horrible au milieu.

0982
Cris, pleurs, larmes viendront auec couteaux,
Semblant fuyr, donront dernier assaut,
L’entour parques planter profonds plateaux,
Vifs repoussez & meurdris de prinsault. [plin saut]

0983
De batailler ne sera donné signe,
Du parc seront contraints de sortir hors:
De Gand l’entour sera cogneu l’enseigne, [l'ensigne]
Qui fera mettre de tous les siens à morts.

0984
La naturelle à si hault hault non bas,
Le tard retour fera marris contens:
Le Recloing ne sera sans debats,
En employant & perdant tout son temps.

0985
Le vieil tribun au point de la trehemide
Sera pressee, captif ne deliurer,
Le vueil, non vueil, le mal parlant timide,
Par legitime à ses amis liurer.

0986
Comme vn gryphon viendra le Roy d’Europe,
Accompagné de ceux d’Aquilon,
De rouges & blancs conduira grand troupe,
Et iront contre le Roy de Babylon.

0987
Grand Roy viendra prendre port pres de Nisse,
Le grand empire de la mort si enfera
Aux Antipolles, posera son genisse,
Par mer la Pille tout esuanouyra.

0988
Pieds & Cheual à la seconde veille,
Feront entree vastient tout par la mer:
Dedans le poil entrera de Marseille,
Pleurs, crys, & sang, onc nul temps si amer.

0989
De brique en marbre seront les murs reduits,
Sept & cinquante annees pacifiques:
Ioye aux humains, renoué l’aqueduict,
Santé, grands fruicts, ioye & temps melifique.

0990
Cent fois mourra le tyran inhumain,
Mis à son lieu sçauant & debonnaire,
Tout le Senat sera dessous sa main,
Fasché sera par malin temeraire.

0991
Clergé Romain l’an mil six cens & neuf,
Au chef de l’an feras election:
D’vn gris & noir de la Compagne yssu, [Compagnie]
Qui onc ne fut si maling.

0992
Deuant le pere l’enfant sera tué,
Le pere apres entre cordes de ionc,
Geneuois peuple sera esuertue,
Gisant le chef au milieu comme vn tronc.

0993
La barque neufue receura les voyages,
Là & aupres transfereront l’Empire:
Beaucaire, Arles retiendrons les hostages,
Pres deux colomnes trouuees de Porphire.

0994
De Nismes d’Arles, & Vienne contemner,
N’obeyr à ledict d’Hespericque:
Aux labouriez pour le grand condamner,
Six eschappez en habit seraphicque.

0995
Dans les Espaignes viendra Roy trespuissant,
Par mer & terre subiugant or Midy:
Ce mal fera, rabaissant le croissant,
Baisser les aisles à ceux du Vendredy.

0996
Religion du nom des mers vaincra,
Contre la secte fils Adaluncatif,
Secte obstinée déplorée craindra,
Des deux blessez par Aleph & Aleph.

0997
Triremes pleines de tout aage captif,
Temps bon à mal, le doux pour amertume :
Proye à Barbares trop tost seront hatifs,
Cupid de voir plaindre au vent la plume.

0998
La splendeur claire à pucelle ioyeuse,
Ne luyra plus, long temps sera sans sel:
Auec marchans, ruffiens, loups odieuse,
Tous pesle mesle, montre vniversel.

0999
La fin le loup, le lyon, beuf, & l’asne,
Timide dama seront auec mastins:
Plus ne cherra à eux la douce manne,
Plus vigilance & custode aux mastins.

1000
Le grand empire sera par Angleterre,
Le pempotam des ans plus de trois cens:
Grandes copies passer par mer & terre,
Les Lusitains n’en seront pas contens.