|
C025 Parquoy estans les causes indifferantes, indifferentement
produictes, & non produictes, le presaige partie aduient,
ou à [a] esté predit.
C026 Car l'entendement creé intellectuellement ne peult
voir occultement, sinon par la voix faicte au lymbe moyennant
la exigue flamme en quelle partie les causes futures se viendront
à incliner.
C027 Et aussi mon filz ie te supplie que iamais tu ne vueilles
emploier ton entendement à telles resueries & vanités
qui seichent le corps & mettent à perdition l'ame,donnant
trouble au foyble sens:mesmes la vanité de la plus que
execrable magie reprouuée iadis par les sacrées
escriptures, & par les diuins canons :
C028 au chef du-quel est excepté le iugement de l'astrologie
iudicielle:par laquelle & moyennant inspiration & reuelation
diuine par continuelles veilles & supputations,auons noz
propheties redigé par escript.
C029 Et combien que celle occulte Philosophie ne fusse reprouuée,n'ay
onques volu presenter leurs effrenées persuasions: combien
que plusieurs volumes qui ont estés cachés par
longs siecles me sont estés manifestés.
C030 Mais doutant ce qui aduiendroit en ay faict, apres la lecture,
present à Vulcan, que pendant quil les venoit à
deuorer, la flamme leschant l'air rendoit vne clarté insolite,
plus claire que naturelle flamme, comme lumiere de feu de clystre
fulgurant, illuminant subit la maison, comme si elle fust esté
en subite conflagration.
C031
Parquoy affin que à l'auenir ne feusses abusé prescrutant
la parfaicte transformation tant seline que solaire, & soubz
terre metaulx incorruptibles, & aux vndes occultes, les ay
en cendres conuertis.
C032
Mais quant au iugement qui se vient paracheuer moyennant le iugement
celeste cela te veulx ie manifester:parquoy auoir congnoissance
des causes futures reiectant loing les fantastiques imaginations
qui aduiendront,limitant la particularité des lieux par
diuines inspirations supernaturelle
C033 accordant aux celestes figures,les lieux, & vne partie
du temps de proprieté occulte par vertu, puissance &
faculté diuine : en presence de laquelle les troys temps
sont comprins par eternité, reuolution tenant à
la cause passée, presente, & future: quia omnia sunt
nuda & aperta &c. [parce que toutes choses sont nues
et découvertes, etc.].
C034 Parquoy mon filz, tu peult facilement nonobstant ton tendre
cerueau,comprendre que les choses qui doiuent auenir se peuuent
prophetizer par les nocturnes & celestes lumieres, que sont
naturelles, & par l'esprit de prophetie:
C035 non que ie me vueille attribuer nomination ni effect prophetique,
mais par reuelée inspiration, comme homme mortel esloigné
non moins de sens au ciel, que des piedz en terre,
C036 Possum non errare,falli,decipi [Je ne puis point errer,
ni faillir, ni être abusé]:suis pecheur plus grand
que nul de ce monde, subiect à toutes humaines afflictions.
C037 Mais estant surprins par foys la sepmaine lymphatiquant,
& par longue calculation rendant les estudes nocturnes de
souefue odeur,i'ay composé liures de propheties contenant
chascun cent quatrains astronomiques de propheties,lesquelles
i'ay vn peu voulu raboter obscurement: & sont perpetuelles
vaticinations, pour d'icy à l'an 3797.
C038 Que possible fera retirer le front à quelques vns
en voyant si longue extension, & par souz toute la concauité
de la lune aura lieu & intelligence: & ce entendent vniuersellement
par toute la terre, les causes mon filz. Que si tu is l'vaage
naturel & humani [vis l'aage naturel & humain], tu verras
deuers ton climat au propre ciel de ta natiuité les futures
auantures preuoyr.
C039 Combien que le seul Dieu eternel, soit celuy seul qui congnoit
l'eternité de sa lumiere,procedant de luy mesmes:
C040 & ie dis franchement que à ceux à qui
sa magnitude immense, qui est sans mesure & incomprehensible,ha
voulu par longue inspiration melancholique reuéler, que
moyennant icelle cause occulte manifestée diuinement,
principalement de deux causes principales qui sont comprinses
à l'entendement de celui inspiré qui prophetise
l'vne est que vient à infuser, esclarcissant la lumiere
supernaturelle au personnage qui predit par la doctrine des astres,
& prophetise par inspirée reuelation:laquelle est
une certe participation de la diuine eternité: moyennant
le prophete vient à iuger de cela que son diuin esperit
luy ha donné par le moyen de Dieu le createur, & par
vne naturelle instigation:
C041 cestassauoir que ce que predict, est vray, & a prins
son origine etheréement : & telle lumiere & flambe
exigue est de toute efficace, & de telle altitude:non moins
´q la naturelle clarté & naturelle lumiere rend
les philosophes si asseurés que moyennant les principes
de la premiere cause ont attainct à plus profondes abysmes
de plus haute doctrine.
C042 Mais à celle fin, mon filz, que ie ne vague trop
profondement pour la capacité future de ton sens, &
aussi que ie trouue que les lettres feront si grande & incomparable
iacture, que ie treuue le monde auant l'vniverselle conflagration
aduenir tant de deluges & si hautes inundations, qu'il ne
sera gueres terroir qui ne soit couuert d'eau : & sera par
si long temps que hors mis enographies & topographies, que
le tout ne soit peri:
C043 aussi auant telles & apres inundations, en plusieurs
contrées les pluies seront si exigues, & tombera du
ciel si grande abondance de feu, & de pierres candentes,
que ni demourra rien qu'il ne soit consummé: & ceci
aduenir, & en brief, & auant la derniere conflagration.
C044 Car encores que la planette de Mars paracheue son siecle,
& à la fin de son dernier periode, si le reprendra
il: mais assemblés les vns en Aquarius par plusieurs années,
les autres en Cancer par plus longues & continues.
C045 Et maintenant que sommes conduicts par la lune, moyennant
la totale puissance de Dieu eternel, que auant qu'elle aye paracheué
son total circuit,le soleil viendra, & puis Saturne.
C046 Car selon les signes celestes le regne de Saturne sera de
retour, que le tout calculé, le monde s'approche, d'vne
anaragonique reuolution:
C047 & que de present que ceci i'escriptz auant cent &
septante sept ans troys moys vnze iours, par pestilence, longue
famine, & guerres, & plus par les inundations le monde
entre cy & ce terme prefix, auant & apres par plusieurs
foys, sera si diminué, & si peu de monde sera, que
lon ne trouuera qui vueille prendre les champs, qui deuiendront
liberes aussi longuement qu'ilz sont estés en seruitude
:
C048 & ce quant au visible iugement [iugemeut] celeste, que
encores que nous soyons au septiesme nombre de mille qui paracheue
le tout, nous approchant du huictiesme, ou est le firmament de
la huictiesme sphere, que est en dimension laditudinaire, ou
le grand Dieu eternel viendra paracheuer la reuolution:ou les
images celestes retourneront à se mouuoir, & le mouuement
superieur qui nous rend la terre stable & ferme, non inclinabitur
in sæculum sæculi [ne sera pas éternellement
incliné] : hors mis que quand son vouloir sera accompli,
ce sera, mais non point aultrement :
C049 combien que par ambigues opinions excedants toutes raisons
naturelles par songes Machometiques,aussi aucune fois Dieu le
createur par les ministres de ses messaigiers de feu en flamme
missiue vient à proposer aux sens exterieurs, mesmement
à nos yeulx, les causes de future prediction significatrices
du cas futur, qui se doibt à cellui qui presaige manifester.
C050 Car le presaige qui se faict de la lumiere exterieure vient
infalliblement à iuger partie auecques & moyennant
le lume exterieur: combien vrayement que la partie qui semble
auoir par l'œil de l'entendement,
C051 ce que n'est par la lesion du sens imaginatif: la raison
est par trop euidente, le tout estre predict par afflation de
diuinité, & par le moyen de l'esprit angelique inspiré
à l'homme prophetisant, rendant oinctes de vaticinations,
le venant à illuminer, luy esmouuant le deuant de la phantasie
par diuerses nocturnes aparitions, ´q par diurne certitude
pphetise par administration asttronomicque, conioincte de la
sanctissime future prediction, ne consistant ailleurs ´q
au courage libre.
C052 Vient asture entendre mon filz, que ie trouue par mes reuolutions
que sont accordantes à reuellée inspiration, que
le mortel glaiue s'aproche de nous pour asture par peste, guerre
plus horrible que à vie de trois hommes n'a esté,
& famine, lequel tombera en terre, & y retournera souuent,
C053 car les astres s'accordent à la reuolution:&
aussi a dit Visitabo in virga ferrea iniquitates eorum, &
in verberibus percutiam eos [Je réprimerai leurs iniquités
avec une verge de fer et je les châtierai à coups
de fouet].
C054 car la misericorde du seigneur ne sera poinct dispergée
vn temps mon filz, que la plus part de mes propheties seront
acomplies, & viendront estre par accompliment reuoluës.
C055 Alors par plusieurs foys durant les sinistres tempestes,
Conteram ergo dira le Seigneur, & confringam, & non miserebor
[Je les foulerai aux pieds, je les briserai et je n'en aurai
pas pitié] :
C056 & mille autres auantures qui auiendront par eaux &
continuelles pluies, comme plus à plain i'ay redigé
par escript aux miennes autres propheties qui sont composées
tout au long, in soluta oratione, limitant les lieux, temps,
& le terme prefix que les humains apres venus, verront cognoissants
les auentures auenues infalliblement,
C057 comme auons noté par les autres, parlans plus clairement:
nonobstant que sous nuée seront comprises les intelligences:sed
quando submouenda erit ignorantia [mais quand viendra le temps
où doit se dissiper l'ignorance], le cas sera plus esclarci.
C058 Faisant fin mon filz, prens donc ce don de ton pere M. Nostradamus,
esperant toy declarer vne chascune prophetie des quatrains ici
mis.Priant au Dieu immortel qui te veuille prester vie longue
en bonne & prospere felicité.
C059 De Salon ce j. de Mars 1555. |