Centurie I
< sommaire >

de la première édition de Macé Bonhomme
parue à Lyon en 1555 (bibliothèque d'Albi)
du quatrain 0036 au 0100

mise en page provisoire

0037
Vng peu devant que le soleil s’esconse
Conflict donné, grand peuple dubieux:
Proffligés,port marin ne faict responce,
Pont & sepulchre en deux estranges lieux.

0038
Le Sol & l’aigle au victeur paroistront:
Responce vaine au vaincu l’on asseure,
Par cor ne crys harnoys n’arresteront
Vindicte,paix par mort si acheue à l’heure.

0039
De nuict dans lict le supresme estrangle
Pour trop auoir subiourné,blond esleu,
Par troys l’empire subroge exancle,
A mort mettra carte,pacquet ne leu.

0040
La trombe faulse dissimulant folie
Fera Bisance vn changement de loys:
Hystra d’Egypte qui veult que l’on deslie
Edict changeant monnoyes & aloys.

0041
Siege en cité,& de nuict assaillie,
Peu eschapés:non loing de mer conflict.
Femme de ioye,retours filz defaillie
Poison & lettres cachées dans le plic.

0042
Le dix Kalendes d’Apuril de faict Gotique
Resuscité encor par gens malins:
Le feu estainct,assemblée diabolique
Cherchant les or du d’Amant & Pselyn.

0043
Auant qu’auienne le changement d’empire,
Il auiendra vn cas bien merueilleux,
Le champ mué,le pillier de porphyre
Mis,translaté sus le rochier noilleux.

0044
En brief seront de retour sacrifices,
Contreuenants seront mis à martyre:
Plus ne seront moines abbés ne nouices:
Le miel sera beaucoup plus cher que cire.

0045
Secteur de sectes grand preme au delateur:
Beste en theatre,dressé le ieu scenique:
Du faict antique ennobli l’inuenteur,
Par sectes monde confus & scismatique.

0046
Tout aupres d’Aux, de Lectore & Mirande
Grand feu du ciel en troys nuicts tumbera:
Cause auiendra bien stupende & mirande:
Bien peu apres la terre tremblera.

0047
Du lac Leman les sermons facheront:
Des iours seront reduicts par les sepmaines,
Puis mois,puis an,puis tous deffailliront,
Les magistrats damneront leurs loys vaines.

0048
Vingt ans du regne de la lune passés
Sept mil ans autre tiendra sa monarchie:
Quand le soleil prendra ses iours lassés
Lors accomplir & mine ma prophetie.

0049
Beaucoup beaucoup auant telles meneés
Ceux d’Orient par la vertu lunaire
Lan mil sept cent feront grand emmenées
Subiugant presques le coing Aquilonaire.

0050
De l’aquatique triplicité naistra
D’vn qui fera le ieudy pour sa feste:
Son bruit,loz, regne,sa puissance croistra,
Par terre & mer aux orients tempeste.

0051
Chef d’Aries,Iuppiter & Saturne,
Dieu eternel quelles mutations!
Puis par long siecle son maling temps retourne,
Gaule & Itale quelles esmotions!

0052
Les deux malins de Scorpion conioints,
Le grand seigneur meurtri dedans sa salle:
Peste à l’eglise par le nouveau roy ioint,
L’Europe basse & Septentrionale.

0053
Las qu’on verra grand peuple tormenté
Et la loy saincte en totale ruine
Par aultres loyx toute Chrestienté,
Quand d’or d’argent trouue nouuelle mine.

0054
Deux revolts faits du malin falcigere,
De regne & siecles faict permutation:
Le mobil signe à son endroict si ingere
Aux deux egaux & d’inclination.

0055
Sous l’opposite climat Babylonique
Grande sera de sang effusion,
Que terre & mer,aïr,ciel sera inique:
Secte,faim,regnes, pestes,confusion.

0056
Vous verrés tost & tard faire grand change
Horreurs extremes, & vindications,
Que si la lune conduicte par son ange
Le ciel s’approche des inclinations.

0057
Par grand discord la trombe tremblera.
Accord rompu dressant la teste au ciel:
Bouche sanglante dans le sang nagera:
Au sol sa face ointe de laict & miel.

0058
Trenché le ventre,naistra auec deux testes,
Et quatre bras:quelques an s entier viura:
Iour qui Alquilloye celebrera ses festes
Foussan,Turin,chief Ferrare suyura.

0059
Les exiles deportés dans les isles
Au changement d’vng plus cruel monarque,
Seront meurtrys: & mis deux des scintilles
Qui de parler ne seront estés parques.

0060
Vn Empereur naistra pres d’Italie,
Qui a l’Empire sera vendu bien cher,
Diront auecques quels gens il se ralie
Qu’on trouuera moins prince que boucher.

0061
La republique miserable infelice
Sera vastée du nouueau magistrat:
Leur grand amas de l’exil malefice
Fera Sueue rauir leur grand contract.

0062
La grande perte las que feront les letres:
Auant le cicle de Latona parfaict,
Feu,grand deluge plus par ignares sceptres
Que de long siecle ne se verra refaict.

0063
Les fleaux passés diminue le monde
Long temps la paix terres inhabitées
Seur marchera par ciel,terre,mer, & onde:
Puis de nouueau les guerres suscitées.

0064
De nuit soleil penseront avoir veu
Quand le pourceau demy-homme on verra,
Bruict,chant,bataille,au ciel battre aperceu
Et bestes brutes a parler lon orra.

0065
Enfant sans mainsiamais veu si grand foudre:
L’enfant royal au ieu d’œsteuf blessé.
Au puy brises:fulgures alant mouldre:
Trois sous les chaines par le milieu troussés:

0066
Celui qui lors portera les nouuelles,
Apres vn peu il viendra respirer.
Viuiers,Tournon,Montferrant & Pradelles,
Gresle & tempestes les fera souspirer.

0067
La grand famine que ie sens approcher,
Souuent tourner,puis estre vniuersele,
Si grande & longue qu’on viendra arracher
Du bois racine,& l’enfant de mammelle.

0068
O quel horrible & malheureux torment
Troys innocens qu’on viendra à liurer.
Poyson suspecte,mal garde tradiment
Mis en horreur par bourreaux enyurés.

0069
La grand montaigne ronde de sept estades,
Apres paix,guerre,faim,inundation,
Roulera loing abysmant grands contrades,
Mesmes antiques,& grand fondation.

0070
Pluie,faim,guerre en Perse non cessée
La foy trop grande trahira le monarque,
Par la finie en Gaule commencée:
Secret augure pour à vng estre parque.

0071
La tour marine troys foys prise & reprise
Par Hespagnols,barbares,Ligurins:
Marseille & Aix, Arles par ceux de Pise
Vast,feu,fer,pillé Auignon des Thurins.

0072
Du tout Marseille des habitans changée,
Course & poursuitte iusques au pres de Lyon.
Narbon.Tholoze par Bourdeaux outragee:
Tués captifz presque d’vn milion.

0073
France à cinq pars par neglect assaillie
Tunys,Argiels esmeus par Persiens,
Leon,Seuille,Barcelonne faillie
N’aura la classe par les Venitiens.

0074
Apres seiourné vogueront en Epire:
Le grand secours viendra vers Antioche,
Le noir poil crespe tendra fort à l’empire:
Barbe d’ærain le roustira en broche.

0075
Le tyran Siene occupera Sauone:
Le fort gaigné tiendra classe marine:
Les deux armées par la marque d’Ancone
Par effraieur le chef s’en examine.

0076
D’vn nom farouche tel proferé sera,
Que les troys seurs auront fato le nom:
Puis grand peuple par langue & faict duira
Plus que nul autre aura bruit & renom

0077
Entre deux mers dressera promontoire
Que puis mourra par le mords du cheual:
Le sien Neptune pliera voyle noire,
Par Calpre & classe aupres de Rocheual.

0078
D’un chief viellard naistra sens hebete,
Degenerant par sauoir & par armes
Le chef de Françe par sa sœur redouté:
Champs diuisés,concedés aux gendarmes.

0079
Bazaz,Lectore,Condon,Ausch,& Agine
Esmeus par loys,querele & monopole.
Car Bourd. Thoulouze Bay.metra en ruine
Renouueler voulant leur tauropole.

0080
De la sixiesme claire splendeur celeste
Viendra tonner si fort en la Bourgoigne:
Puis naistra monstre de treshideuse beste.
Mars,apuril,May,Iuing grand charpin & rongne.

0081
D’humain troupeau neuf seront mis à part
De iugement & conseil separés:
Leur fort sera diuisé en depart
kap.Qhita lambda mors,bannis esgarés.

0082
Quand les colomnes de bois grande tremblée
D’Auster conduicte couuerte de rubriche
Tant vuidera dehors grand assemblée,
Trembler Vienne & le païs d’Austriche.

0083
La gent estrange diuisera butins,
Saturne en Mars son regard furieux:
Horrible strage aux Tosquans & Latins,
Grecs,qui seront à frapper curieux.

0084
Lune obscurcie aux profondes tenebres,
Son frere passe de couleur ferrugine:
Le grand caché long temps sous les latebres,
Tiedera fer dans la plaie sanguine. [playe]

0085
Par la response de dame,roy troublé:
Ambadassadeurs mespriseront leur vie: [Ambassadeurs]
Le grand ses freres contrefera doublé
Par deus mourront,ire,haine,enuie. [deux] [haisne]

0086
La grande royne quand se verta vaincu, [verra vaincue]
Fera exces de masculin courraige: [couraige]
Sus cheual,fluue passera toute nue,
Suite par fer: à foy fera oultrage. [oultraige]

0087
Ennosigée feu du centre de terre
Fera trembler au tour de cité neusue:
Deux grands rochiers long temps feront la guerre
Puis Arethusa rougira nouueau fleuue. [fluue]

0088
Le diuin mal surprendra le grand prince
Vn peu deuant aura femme espousée, [espousée]
Son puy & credit à vn coup viendra mince,
Conseil mourra pour la teste rasée.

0089
Touts ceux de Ilerde seront dedans Mosselle,
Metans à mort tous ceux de Loyre & Seine: [Metants]
Secours marin viendra pres d’haulte velle
Quand Hespagnols ouurira toute veine.

0090
Bourdeaux,Poitiers,au son de la campane,
A grande classe ira iusques à l’Angon,
Contre Gauloys sera leur tramontane,
Quand monstres hideux naistra pres de Orgon. [monstre]

0091
Les dieux feront aux humains apparence,
Ce quils seront auteurs de grand conflit: [autheurs]
Auant ciel veu serain espée & lance,
Que vers main gauche sera plus grand afflit

0092
Sous vn la paix par tout sera clamée,
Mais non long temps pille & rebellion,
Par refus ville,terre & mer entamée,
Morts & captifz le tiers d’vn milion.

0093
Terre Italique pres des monts tremblera,
Lyon & coq non trop confederés,
En lieu de peur l’un l’autre saidera
Seul Castulon & Celtes moderés.

0094
Au port Selin le tyran mis à mort
La liberté non pourtant recouurée:
Le nouueau Mars par vindicte & remort:
Dame par force de frayeur honorée.

0095
Deuant moustier trouué enfant besson
D’heroic sang de moine & vestutisque:
Son bruit par secte langue & puissance son
Qu’on dira fort eleué le vopisque.

0096
Celui qu’aura la charge de destruire
Temples,& sectes,changés par fantasie,
Plus aux rochiers qu’aux viuans viendra nuire
Par langue ornée d’oreilles ressaisies.

0097
Ce que fer flamme n’asceu paracheuer,
La doulce langue au conseil viendra faire.
Par repos,songe,le roy fera resuer.
Plus l’ennemi en feu,sang militaire.

0098
Le chef qu’aura conduit peuple infini
Loing de son ciel,de meurs & langue estrange:
Cinq mil en Crete & Thessale fini,
Le chef fuiant sauué en marine grange.

0099
Le grand monarque que fera compaignie
Auecq deux roys vnis par amitié:
O quel souspir fera la grand mesnie:
Enfants Narbon à l’entour quel pitie!

0100
Long temps au ciel sera veu gris oiseau
Au pres de Dole & de Tousquane terre,
Tenant au bec vn verdoiant rameau,
Mourra tost grand,& finira la guerre.